Кардынал Бэртонэ: нападкі на Святога Айца вельмі добра арганізаваны
“Нападкі на Касцёл
існавалі заўсёды, але на гэты раз яны больш мэтанакіраваныя, больш жорскія і добра
арганізаваныя”, - сказаў 4 чэрвеня ў інтэрв’ю італьянскаму дзяржаўнаму тэлебачанню
кардынал Дзяржсакратар Тарчызіо Бэртонэ. Касцёл патрабуе празрыстасці, але знаёмства
толькі з некалькімі дакументамі, не дастаткова для пазнання ўсёй праўды, сказаў іерарх,
маючы на ўвазе скрадзеную дакументацыю Папы і Святога Пасаду. “Высвятленне падзей
з’яўляецца плёнам дыялогу, асабістых адносін і навяртання сэрца, а не вынікам пазнання
дакуметаў ці бюракратыі”, - сказаў найбліжэйшы супрацоўнік Папы. “Тое, што самае сумнае
ў гэтых падзеях і фактах – гэта парушэнне недатыкальнасці прыватнага жыцця Святога
Айца і яго найбліжэйшых супрацоўнікаў”, - падкрэсліў кардынал Бэртонэ. Ён адзначыў,
што сённяшняя сітуацыя – гэта не час падзелаў ва ўлонні Касцёла, але наадварот, час
адзінства і перш за ўсё сілы, якая ляжыць у веры – гэта час прыняцця рашэнняў. “Гэта
дні адзінства ўсіх тых, хто жадае сапраўды служыць Касцёлу”, - заўважыў іерарх.
На
пытанне, як Бэнэдыкт ХVI перажывае гэтыя падзеі, кардынал Бэртонэ адказаў, што інструментальныя
атакі былі на Касцёл заўсёды, ва ўсе часы. “Я сам памятаю з майго досведу нападкі
на Касцёл падчас пантыфікату Паўла VI, часы зусім недалёкія”, - падзяліўся кардынал
Дзяржсакратар. Ён прызнаўся, што Папа вельмі спакойны чалавек, чалавек вялікай веры
і малітвы. “Безумоўна, ён не дасць запалохаць сябе любога роду нападкамі або рознага
маштабу забабонамі. Той, хто знаходзіцца побач са Святым Айцом і працуе разам з ім,
падтрымліваюцца вялікай маральнай сілай Папы”, - адзначыў кардынал Бэртонэ.