Католікі і праваслаўныя разам аб эканамічным крызісе і беднасці
5 чэрвеня ў Лісабоне
іерархі Каталіцкага Касцёла і Праваслаўнай Царквы разам абмяркуюць праблемы эканамічнага
крызісу і беднасці ў сучаснай Еўропе. На ІІІ Еўрапейскім каталіцка-праваслаўным форуме
праваслаўную дэлегацыю ўзначаліць Мітрапаліт Іспаніі і Партугаліі Палікарп; у яе склад
увойдуць прадстаўнікі Маскоўскага, Сербскага, Румынскага і Грэцкага Патрыярхатаў,
а таксама Кіпрскай, Польскай і Албанскай Цэркваў. Каталіцкую дэлегацыю узначаліць
старшыня Рады Біскупскіх Канферэнцый Еўропы кардынал Пэтэр Эрдо. У форуме прымуць
удзел таксама арцыбіскуп Тадэвуш Кандрусевіч і арцыбіскуп Паоло Пэццы. Падчас сустрэчы
будуць абмеркаваны тры аспекты – пошук прычын эканамічнага крызісу, пошук грамадскіх
і эклезіяльных адказаў на яго і роля, якую Касцёл павінен адыгрываць у гэты асаблівы
момант для еўрапейскага кантыненту.
Як адзначыў кардынал Пэтэр Эрдо, мэтай
сустрэчы не будзе эканамічна-фінансавы аналіз, хоць эксперты ў дадзенай галіне і будуць
прысутнічаць. “Мы разумеем, што сённяшні эканамічны крызіс – гэта толькі вярхушка
айсберга; ён мае больш глыбокія крыніцы. Гэта перш за ўсё змена культурнай мадэлі
грамадства, прасякнутай некантралюемым лібералізмам, што ставіць эканамічную выгаду
вышэй за агульнае дабро асобы. Па словах кардынала, выхадам з дадзенай сітуацыі з’яўляецца
эканоміка любові.
Ідэя правядзення такіх экуменічных форумаў нарадзілася 4
гады таму. Сустрэча праходзіць раз на 2 гады, прычым яе прымаюць па чарзе краіны з
праваслаўнай і каталіцкай большасцямі. Гаспадарамі ўжо былі Італія і Грэцыя.