Fjalët e Papës në përfundim të drekës së djeshme me përfaqësuesit e familjeve të Takimit
të Milanos
Përfundoi dje në Milano,Takimi VII Botëror i Familjeve me temë “Familja: puna dhe
festa”. Pas Meshës së paradites e pas Lutjes së Engjëllit të Tënzot, Papa Benedikti
XVI shkoi në kryeipeshkvi për drekë me përfaqësuesit e disa familjeve nga të pesë
kontinentet. Kardinali Skola dhe kardinali Tetamanci përshëndetën Atin e Shenjtë dhe
i dhanë si dhuratë një kopje të Librit të Ungjillit ambrozian, realizuar nga artistë
të shquar, nën drejtimin e don Umberto Bordonit. Në kopertinë, pasqyrimi ikonografik
i Jeruzalemit qiellor. Benedikti XVI foli pa letër: “Të dashur miq, është bukur
që në fund mbërrijmë sërish tek Fjala e Zotit, e cila është çelësi i jetës, çelësi
i të menduarit, i të jetuarit: kështu filluam e po me Fjalën e Zotit po përfundojmë.
Jemi në atmosferën e jetës së vërtetë. E, desha thjesht t’ju falenderoj për gjithçka
përjetova këto ditë: për këtë përvojë të Kishës së gjallë… Nëse nganjëherë mendojmë
se barka e Shën Pjetrit lëkundet tepër mes tallazeve të kundërshtarëve të fortë, shohim
edhe se Zoti është i pranishëm, është i gjallë, është ringjallur vërtet dhe ka në
dorë qeverisjen e botës e zemrën e njerëzve. Kjo përvojë e Kishës së gjallë, që jeton
nga dashuria e Zotit, që jeton për Krishtin e Ringjallur, është – si të thuash – dhurata
e këtyre ditëve. Pra, falenderojmë Zotin për këtë. Falenderoj edhe kardinalin
Skola, kardinalin Tetamanci, bashkëpunëtorët e tyre, të gjithë; atyre që bashkëpunuan
e festuan: faleminderit të gjithëve”.