Ալիս Պետրոսեան Եւ Ճոյս Փիլիպոսեան-Սթայն Կ՛արժանանան «Էլիս Այլըտ»ի Շքանշանին .
2012ի «Էլիս Այլըտ» շքանշանին արժանացողներուն շարքին մէջ տեղ գրաւած են կրթական մարզին
մէջ երկարամեայ սպասարկութիւն մատուցող Ալիս Պետրոսեանը եւ բարերար Ճոյս Փիլիպոսեան-Սթայնը:
Ալիս Պետրոսեան ներկայիս նախագահն է Քալիֆորնիոյ վարժարաններու տնօրէններու միութեան,
իսկ վերջին 42 տարիներու ընթացքին տարբեր մարզերու մէջ նպաստած է Քալիֆորնիոյ աշակերտութեան
կրթութեան մակարդակի բարելաւման: Ան 31 տարուան սպասարկութիւն ունի Կլենտէյլի միացեալ
կրթաշրջանին մէջ. 12 տարիներու ընթացքին եղած է քաղաքի կրթական սպասարկութեանց վերահսկիչի
օգնական: : Ան նաեւ 11 տարիներ դասաւանդած է Կլենտէյլ եւ Հէյուըրտ քաղաքներուն մէջ
Իր
կարգին, Նիւ Եորք ծնած եւ ներկայիս Քալիֆորնիոյ Ինտիըն Ուելզ քաղաքը հաստատուած Ճոյս
Փիլիպոսեան-Սթայն ծանօթ է իր մարդասիրական գործունէութեամբ եւ անդամ է Ամերիկայի հայ
աւետարանչական միութեան վարչութեան, նաեւ համանախագահն է նոյն միութեան Որբերու եւ երեխաներու
հոգատարութեան յանձնախումբին, եւ հոգաբարձութեան անդամ՝ Ստեփան Փիլիպոսեանի անուան հիմնադրամին
եւ Պէյրութի «Հայկազեան» համալսարանին: Ան զաւակն է «Հայկազեան»ի հիմնադիրներէն Ստեփան
եւ Սրփուհի Փիլիպոսեաններուն, որոնք Նիւ Փորքի Էլիս կղզիէն անցնելով՝ Միացեալ Նահանգներ
մուտք գործած են:
«Էլիս Այլըտ»ի շքանշանը կը շնորհուի Միացեալ Նահանգներու Ցեղային
կազմակերպութեանց ազգային համախմբումին կողմէ, նպատակ ունենալով ցեղային եւ կրօնական
տարբեր խմբաւորումներու միջեւ հասկացողութիւնն ու յարգանքը զօրացնել: Շքանշնաը կը շնորհուի
անոնց, որոնք երկիրին իրենց տրամադրած սպասարկութեանց կողքին, յատկանշական ներդրում ունեցած
են նաեւ իրենց ազգային համայքներու կեանքին մէջ: Շքանշանը պաշտօնապէս ճանչցուած է Միացեալ
Նահանգներու Ներկայացուցիչներու տան եւ Ծերակոյտին կողմէ: