Hetimet në Vatikan. Atë Lombardi: po shqyrtohen dokumentet e gjetura, kërkojmë të
vërtetën duke respektuar njerëzit
Zëdhënësi i Selisë së Shenjtë, atë Federico Lombardi sqaroi disa nga deklaratat, që
kanë dalë në shtypin italian, përsa i përket arrestimit të mazhordomit të Papës, Paolo
Gabrieli, i akuzuar se ka nxjerrë jashtë dokumenta të rezervuara nga apartamenti i
Benediktit XVI. Pasi sqaroi se nuk është kërkuar bashkëpunimi me autoritetet italiane,
theksoi se marrja në pyetje e të pandehurit po bëhet në territorin e Vatikanit nga
Xhandarmëria e shtetit papnor. Veprimet e mëtejshme do të vendosen në çastin e duhur.
Ndërkaq, po shqyrtohen të gjitha dokumentet e gjetura në shtëpinë e mazhordomit. Paolo
Gabrieli ndodhet në një dhomë sigurie në Kazermën e Xhandarmërisë e nuk është e thënë
t’i japin arrestin shtëpiak, siç kanë kërkuar avokatët e tij. Pyetja e kamerierit,
në praninë e avokatëve të vet, mund të bëhet të hënën e ardhshme: “Më duket
se po bën hapa përpara vullneti për të gjetur të vërtetën, për të sqaruar e për të
qenë transparentë, megjithëse gradualisht, prandaj, ndershmërisht, mendoj se po përpiqemi
ta zgjidhim këtë çështje të re: kërkojmë të vërtetën, përpiqemi të kuptojmë ç’ka ndodhur
objektivisht. Por, më parë duhet të jemi të sigurtë, sepse duhen respektuar njerëzit
dhe e vërteta”. Gjithashtu, atë Lombardi përgënjeshtroi lajmin e publikuar
në shtyp, sipas të cilit kardinali Kamilo Ruini, ish-vikar i dioqezës së Romës, ka
folur me Sekretarin aktual të Shtetit të Vatikanit, kardinalin Bertone përsa i përket
letrave të imzot Viganò-së, ku denoncoheshin veprime të dyshimta në Institutin për
Veprat Fetare (Banka e Vatikanit). Gjithashtu, Ruini nuk ka folur as për çështjen
e Mexhugorjes, për të cilën është ngarkuar nga Papa të studiojë fenomenin e dukjeve
të Zojës. E në fund, edhe hipoteza për dorëheqjen e Papës, që është krejtësisht fantazi,
theksoi atë Federiko Lombardi: “Është pikërisht çasti e situata, për t’i treguar
vlerësim Atit të Shenjtë për shërbimin e tij, për të qenë krejtësisht solidarë me
të e për t’i treguar edhe botës bashkimin, unitetin e koherencën në përballimin e
kësaj çështjeje”.