Кс. Ламбардзі: робяцца крокі для поўнага раскрыцця злачынства крадзяжу папскіх дакументаў
Кіраўнік Залы Друку
Апостальскай Сталіцы кс. Фэдэрыка Ламбардзі папрасіў журналістаў не займацца фантазіраваннем
у сувязі з апошнімі падзеямі ў Ватыкане. Кс. Ламбардзі ўпэўнены, што мэтай многіх
супрацоўнікаў СМІ з’яўляюцца спробы кінуць цень на Святы Пасад. Але нават у гэтай
сітуацыі ніхто не пасмеў крытыкаваць асабіста Папу, разумеючы вялізны сусветны аўтарытэт
Святога Айца, яго маральную і духоўную высокасць, адзначыў Кіраўнік Залы Друку. Ён
паведаміў, што ідзе шчыльнае супрацоўніцтва з італіянскімі спецслужбамі для канчатковага
высвятлення праўды. Прадстаўнік Святога Пасаду падкрэсліў, што не адпавядаюць рэчаіснасці
паведамленні аб быццам бы знойдзеных у кватэры арыштаванага камердынера паштовых канвертах
з адрасамі на іх.
Гаворачы аб сітуацыі вакол Ватыканскага банка, італьянскі
езуіт катэгарычна абверг навіну, быццам кардынал Дзяржсакратар Тарчызіо Бэртонэ меў
прыватную гутарку з прадстаўнікамі фінансавых эліт аб перадачы ім кіраўніцтва Інстытутам
рэлігійных спраў. Адносна адстаўкі яго дырэктара Этторэ Гоццы Тэдэскі, кс. Ламбардзі
сказаў, што на яе паўплывала рашэнне Рады банка, а не Камісіі кардыналаў.