Zoti ngushëllon në vuajtje e trazime. Gjatë audiencës së përgjithshme Papa foli për
lutjen si takim ndërmjet “po-së” së Zotit e “amen” të njeriut.
Të jetosh çdo situatë të bashkuar me Krishtin është mënyra e vetme për të kapërcyer
shkurajimin para vuajtjeve e mundimeve. Kështu tha Benedikti XVI gjatë audiencës së
përgjithshme, mbajtur sot paradite, në Sheshin e Shën Pjetrit në Vatikan.Sot,
gjatë audiencës së përgjithshme, Papa Benedikti XVI, thellësisht i prekur, foli qartë
për ngjarjet aktuale në Vatikan. Kisha, udhëhiqet nga Shpirit Shenjt, pavarësisht
nga ligështia e njeriut, kam besim në bashkëpunëtorët e mi. Ndërsa reflektimin katekizmit
e përqendroi mbi kuptimin e lutjes dhe ngushëllimin e Zotit në çaste të vështira. Pasi
shprehu trishtimin për përhapjen e dokumenteve të rezervuara vatikanase, që këto ditë
ngjallen shumë diskutime, Papa Benedikti XVI pohoi me bindje të thellë se Zoti nuk
e lëshon kurrë dore Kishën e vet. Por, t’i dëgjojmë vetë fjalët e Papës: “Ngjarjet,
që ndodhën këto ditë lidhur me Kurien e bashkëpunëtorët e mi, e trishtuan shumë zemrën
time, por nuk e errësuan kurrë bindjen se, pavarësisht nga ligështia e njeriut, vështirësitë
e provat, Kisha udhëhiqet nga Shpirti Shenjt e Zoti do t’i japë gjithnjë ndihmën
e do ta mbështesë në udhën e saj. Gjithsesi duhet kujtuar se disa mjete komunikimi
arritën në përfundime, të cilat shkojnë shumë më larg se faktet, duke e paraqitur
Selinë e Shenjtë në një mënyrë, që nuk përkon me realitetin. Dëshiroj, prandaj, t’u
përsëris besimin dhe inkurajimin tim bashkëpunëtorëve të mi më të ngushtë dhe të gjithë
atyre që, ditë për ditë, me besnikëri, shpirt flijimi e në heshtje, më ndihmojnë në
kryerjen e shërbimit tim”. Nga ana tjetër, kujtoi Ati i Shenjtë, i duartrokitur
stuhishëm disa herë nga besimtarët e mbledhur në Sheshin e Shën Pjetrit, Zoti na
ngushëllon në çastet kur vuajmë, që edhe ne të mund t’i ngushëllojmë ata, që kalojnë
vështirësi e trazira nga më të ndryshmet. Edhe sot audienca e Papës u frymëzua
nga fjalët e Shën Palit, posaçërisht nga lutja e bekimit dhe e falënderimit drejtuar
Zotit, me të cilën Apostulli i Popujve e hap Letrën e dytë drejtuar Korintianëve: “Të
rrëmben, njëherësh me temën e shqetësimit, tema e ngushëllimit, që nuk shikohet thjesht
si lehtësim i shpirtit, por mbi të gjitha, si inkurajim e nxitje për të mos iu nënshtruar
dëshpërimit e vështirësive. Është ftesë për ta jetuar çdo situatë në bashkim me Krishtin,
që merr mbi vete gjithë vuajtjen e mëkatin e botës, për t’i sjellë dritë, shpresë
e shpërblim. E kështu Jezusi na bën të aftë t’i ngushëllojmë edhe ata, që kalojnë
vështirësi nga më të ndryshmet. Bashkimi i thellë me Krishtin në lutje e besimi në
praninë e tij, na bëjnë të gatshëm t’i ndajmë vuajtjet e mjerimet tona me vëllezërit”. Vetë
Pali e di mirë ç’do të thotë vuajtje, jeton mes vuajtjesh. Të shumta janë vështirësitë
e trazirat, që iu desh t’i kapërcejë, pa rënë kurrë në dëshpërim, pa e humbur për
asnjë çast guximin, i mbështetur nga hiri e nga prania e Zotit Jezu Krisht, të cilit
ia kishte dhuruar gjithë vetveten, pa asnjë kusht. Në jetën e Apostullit nuk gjejmë
asnjë çast, në të cilin t’i ketë munguar ndihma e Atit të mëshirshëm, Hyjit të të
gjitha ngushëllimeve. As atëherë kur, vijoi Papa, për të kumtuar Krishtin, iu desh
të provonte të gjitha llojet e persekutimit, nga rrahja, tek mbyllja në burg: “Jeta
jonë e udha jonë e krishterë shpesh herë janë plot vështirësi, keqkuptime, vuajtje.
Në lidhjen besnike me Zotin, në lutjen e përhershme ditë për ditë, edhe ne mund ta
ndjejmë konkretisht ngushëllimin, që vjen nga Hyji. E kjo e forcon fenë tonë, sepse
na bën të dëgjojmë zërin e Hyjit që na thotë “po’ në Krishtin, duke na bërë ta provojmë
besnikërinë e dashurisë së Tij, e cila arrin deri në dhurimin e të Birit mbi Kryq”. Pasi
u ndalua posaçërisht tek ndihma e patundshme që vjen nga lart, e jo nga ne, Ati i
Shenjtë shpjegoi se feja nuk është thjesht vepër njerëzore; në radhë të parë, është
dhuratë e Zotit, që na jepet pa asnjë interes e na bën të kuptojmë se jetën tonë
duhet ta jetojmë duke e dashur Atë e vëllezërit. E gjithë historia e shëlbimit, vijoi
Papa, është zbulesë progresive e kësaj besnikërie të Zotit, pavarësisht nga pabesitë
e mohimet tona: “Përballë kontrasteve të marrëdhënieve njerëzore,
shpesh edhe familjare, ne nuk tregojmë kujdesin e duhur për ta ruajtur dashurinë pa
interes, sepse kjo kërkon impenjim e flijime. Ndërsa Zoti nuk lodhet kurrë me ne,
vijon të na durojë e me mëshirën e tij të pakufishme, na e shtrin dorën i pari, vijon
të na përsërisë “po’-në, të na pohojë dashurinë e tij të pakufishme. Në ngjarjen e
Kryqit, na ofron masën e dashurisë së tij të pallogaritshme, që nuk njeh kurrfarë
mase”. Përmes Shpirtit Shenjt, që e bën vazhdimisht të pranishme e të gjallë
‘po’-në e Zotit në Jezu Krishtin, në zemrën tonë rritet dëshira për ta ndjekur, që
të mund të hyjmë, një ditë, plotësisht në dashurinë e tij. Asnjë njeri nuk përjashtohet
nga kjo dashuri besnike, e aftë për të pritur me durim, edhe ata, që vijojnë t’i
përgjigjen me një ‘jo’ të prerë, duke i mbyllur zemrat, kur dëgjojnë se Ai po troket.
E pra, Zoti vijon të trokasë. Sepse e kërkon gjithnjë njeriun, çdo njeri, për t’i
dhuruar përsosurinë e jetës, shpresën e paqes. Në takimin me Atin qiellor, dialogojnë
“po’-ja besnike e Zotit e ‘amen” plot bindje nga ana e besimtarit, domethënë, përgjigjja
e fesë, me të cilën e përfundojmë gjithnjë lutjen tonë personale e komunitare. Është
një ‘po’ e vendosur, me të cilën i përgjigjemi nismës së Zotit. Papa i ftoi besimtarët
ta kuptojnë thellësisht termin ‘amen’, që nganjëherë thuhet për forcë zakoni. Në hebraisht
e në aramajkisht ‘amen’ ka kuptimin ‘ta bësh diçka të patundshme’, ‘ta forcosh’ e,
për pasojë, ‘të jesh i bindur’, ose ‘të thuash të vërtetën’. Kështu ‘amen’ i traditës
judaike, u bë ‘amen’ i bashkësive të para të krishtera: “Lutja është
takim me një person, që duhet dëgjuar, me të cilin duhet dialoguar; është takim me
Zotin, i cili përsërit besnikërinë e tij të patundshme, ‘po’-në, që ia thotë çdo njeriu,
edhe ne, për të na dhuruar ngushëllimin e tij në mes të stuhive të jetës e për të
na bërë të jetojmë të bashkuar me Të, një jetë plot gëzim e mirësi, që përkryhet
në amshim”. Duke shqiptuar “amen”, që na bashkon me të, kuptojmë edhe se
këtë besnikëri nuk mund ta fitojmë kurrë me forcat tona: ajo vjen nga Zoti, nga Krishti
vetë, që jeton në ne. Duke përshëndetur në gjuhë të ndryshme besimtarët e mbledhur
në Sheshin e Shën Pjetrit, Papa iu drejtua posaçërisht shtegtarëve vietnamezë të kryedioqezës
së Hoshimin City, besuar kardinalit Zhan-Baptist Pham Minh Man; pjesëmarrësve në simpoziumin
budisto-kristian, që po mbahet në Kastel Gandolfo si dhe të rinjve polakë, që përgatiten
për takimin e Lednicës.