Sot paradite Kuvendi i Shqipërisë e kaloi raundin e parë pa votim, pasi në konkurrimin
për garën presidenciale të Vendit nuk u paraqit asnjë kandidat zyrtar. Më herët
maxhoranca propozoi kandidaturën e gjyqtarit Xhezair Zaganjori për postin e Kreut
të Shtetit, por pa e depozituar zyrtarisht në komisionin e Ligjeve, ndërkohë që opozita
u shpreh kundër saj. Ndërkohë, Konferenca e Kryetarëve e grupeve parlamentare vendosi
të mërkurën, që më datën 4 qershor ora 10:00 të zhvillohet raundi i dytë i votimit
në Kuvend të kandidaturave për Presidentin e ri të Republikës. Kështu, pas mbylljes
pa votim të raundit të parë në seancën e sotme parlamentare, kryetarja Jozefina Topalli
thirri menjëherë konferencën e Kryetarëve për të caktuar datën e votimit të dytë për
Kreun e shtetit. Rregullorja parlamentare (neni 109) përcakton se Presidenti i
Republikës zgjidhet në përputhje me nenet 86, 87 dhe 88 të Kushtetutës, me votim të
fshehtë dhe pa debat. Konferenca e Kryetarëve cakton datën e kryerjes së votimit
për çdo raund votimi të përcaktuar në Kushtetutë. Sekretariati për Procedurat dhe
Votimet është komisioni i votimit, i cili në këtë rast organizon dhe shpall publikisht
rezultatin e votimit. Ndërkohë, komisioni i Ligjeve shqyrton nëse kandidatët për
president i plotësojnë kushtet e përcaktuara në Kushtetutë dhe i paraqesin raportin
seancës plenare, sipas afatit të përcaktuar nga Konferenca e Kryetarëve.