Кардынал Левада тлумачыць нормы адносна прыватных аб’яўленняў
29 мая Кардынал Левада
пракаментаваў апублікаванне на сайце Кангрэгацыі Веравучэння, якую ён узначальвае,
зацверджаных яшчэ папам Паўлам VI у 1978 г., нормаў адносна прызнання прыватных аб’яўленняў
у Касцёле. Іерарх упэўнены, што афіцыйная публікацыя дакумента зможа дапамагчы душпастырам
у складаным працэсе іх распазнання. Кардынал нагадаў, што ў выпадку паінфармавання
аб прыватных аб’яўленнях, адпаведныя касцёльныя ўлады павінны прааналізаваць такі
факт улічваючы пазітыўныя і негатыўныя крытэрыі. Калі яны прыдуць да станоўчай высновы,
могуць дазволіць некаторыя элементы публічнага культу ці ўшанавання, “назіраючы за
імі з вялікай разважлівасцю”.
Касцёльныя ўлады павінны “прысці да маральнай
упэўненасці, або прынамсі вялікай ўпэўненасці, атрыманых у выніку сур’ёзных даследаванняў,
у сапраўднасці факту”, - нагадаў змест дакумента кардынал Левада і назваў некаторыя
адмоўныя крытэрыі, як напрыклад “дактрынальныя памылкі ў разуменні Бога, Найсвяцейшай
Панны Марыі і некаторых святых”.
Цытуючы дакумент, прэфект Кангрэгацыі Веравучэння
нагадаў таксама, як павінны паводзіць сябе кампетэнтныя касцёльныя ўлады ў падобных
абставінах. Калі сярод вернікаў узнікае спантаннае практыкаванне культу ці пашаны,
кампетэнтныя касцёльныя ўлады маюць абавязак сабраць поўную інфармацыю ў гэтай справе
і правесці стараннае даследаванне па гэтым пытанні. У выпадку сумніву яны павінны
ўстрымацца ад любога рашэння і надалей сачыць за сітуацыяй вакол аб’яўленняў.
Кампетэнтнымі
ўладамі, якія могуць ўмяшацца ў справу, паводле Кангрэгацыі Веравучэння, з’яўляюцца
мясцовы Ардынарый, мясцовая біскупская канферэнцыя і, на іх просьбу, Апостальская
Сталіца.