Një mendim për Zojën e Bekuar, në muajin maj: Bukuria e Marisë
Bukuria e Marisë? Ungjijtë nuk flasin fare për bukurinë e Nënës së Krishtit. Kujtojnë
vetëm përvujtërinë e Saj të madhe e pastrinë e plotë virgjërore, bukuri këto, morale
e shpirtërore. Për bukurinë fizike, në vështrimin e parë, asgjë. Megjithatë për Zojën
është shkruar: “Duke ardhur në botë, Jezusi kishte në ballë pasqyrimet e bukurisë
së Virgjërës, kthjelltësinë, shikimin e saj të dlirë, e, ja që tani, në gjithë qenien
e Nënës, pasqyrohet bukuria e Krishtit Shëlbues”. Bukuria e Marisë? Është, në radhë
të parë, shkëlqim, që buron nga hiri. Prej këndej edhe Kryeengjëlli Gabriel e përshëndeti
me fjalën “Hirëplote”. Ndërsa Shën Luigji Maria Grinjon de Monfort e përshkruan
me këto fjalë: “Hyji Atë i mblodhi bashkë të gjitha ujërat, e i quajti det; mblodhi
të gjitha hiret e veta, e i quajti Mari”. “Pikërisht përsosuria e hireve e bën
Virgjërën Mari edhe fizikisht, më të bukur nga të gjitha gratë, që kam njohur ndonjë
herë”, pohonte Bernardetë Subirù në vitin 1854, duke iu përgjigjur pyetjes së komisarit
Zhakomé, ashtu si u përgjigjën të gjithë ata, që patën fatin e padëgjuar ta shohin
“Zonjën e Bukur”. Bukuria e Marisë? Në të vërtetë Shkrimet Shenjte nuk na thonë,
asgjë të drejtpërdrejtë për bukurinë e Saj. Por tërthorazi na e thonë e në njëmijë
mënyra. E shpjegojnë këtë etërit, dijetarët e Kishës e ekzegjetët e Biblës, sipas
të cilëve Kënga e Këngëve flet pikërisht për Marinë, për bukurinë e Asaj, që
quhet “E shumëdashur”, pa asnjë njollë?
1.
Sa e bukur je, mikesha ime, sa e bukur je! Sytë e tu janë pëllumba fshehur
pas degërmisë. Flokët e tu porsi tufë dhish që zbresin brinjash
të Galaadit. 2. Dhëmbët e tu, porsi grigjë delesh
pas të qethurit që dalin jashtë prej ujit; ecin dy e nga dy e
kurrnjë s’ është pa shoqe. 3. Buzët tua janë si
një shirit purpuri, e goja jote e mbushur është me hir, këto faqet
tua - kuq si kokrra e shegës vetojnë nëpër velin tënd. 4.
Qafa jote, si pirgu i Davidit luginën që sundon. Njëmijë mburoja
varur janë në tê, si të ishin armatime për kreshnikë. 5.
E gjiri yt është porsi dy drenusha binjake të një dreri që gjejnë
kullotë ndër lila. 7. S’ka gjë më të mirë se ti,
mikesha ime në ty s’ka kurrnjë njollë. 9.
Ti zemrën krejt ma rrëmbeve, o motër, vashë e nuse, ti zemrën
ma grabite vetëm me një shikim, vetëm me një stolí të gjerdanit
tënd! 12. Je kopsht i thurur ti, o motra
ime, ti vasha-nuse, je kopsht i thurrur e krua i kyçur. 15.
Krua që lag kopshtijet, një krua me ujë të gjallë që gurgullon
prej Libanit.
Kënga e Këngëve 4,1-5.7.9-12-15
Në të gjitha
fushat e artit, në të gjitha kulturat e universit e në të gjitha epokat, një numër
i pallogaritshëm artistësh, të njohur e të panjohur, të tërhequr e të pushtuar nga
shkëlqimi marian, u përpoqën ta pasqyrojnë në artin njerëzor, bukurinë hyjnore e njerëzore
të Marisë. Kështu, duke u nisur nga Bija e Sionit, te Zoja e Këshillit të Mirë, te
Maria meksikane, Zoja e Gudalupes, e Fatimës, te Zojat afrikane, japoneze e tek ikonat
sllave, në botë mund ta sodisim bukurinë e Marisë në aq shumë figura, sa racat njerëzore
nën qiell.