Экуменічнае журы на
Канскім міжнародным кінафестывалі карыстаецца добрай рэпутацыяй і папулярнасцю. Аб
гэтым паведаміў яго сёлетні старшыня швейцарскі тэолаг і кінапубліцыст Шарль Марціг.
З 1974 г. на самым значным міжнародным кінафоруме дзейнічае журы, у якое ўваходзяць
прадстаўнікі розных хрысціянскіх Цэркваў і супольнасцяў. Шэсць яго членаў на працягу
дванаццаці дзён павінны абраць фільм, у якім гаворка ідзе пра духоўнасць, годнасць,
салідарнасць або павагу да навакольнага асяроддзя. Прэмія ўручаецца заўсёды ў дзень
Пяцідзесятніцы.
Задача экуменічнага журы, як заявіў Марціг, паказаць прысутнасць
хрысціянскіх Цэркваў у культуры. “Мы хочам, каб тут, у Канах, нас успрымалі сур’ёзна”,
- сказаў ён. Яшчэ адна мэта – зразумець, што турбуе сучасны сусветны кінематограф,
якія пытанні і праблемы існуюць, чым ён можа быць карысным для нашых Цэркваў, паведаміў
кінапубліцыст.
Першым крытэрыем ацэнкі фільмаў, па словах Марціга, з’яўляецца
эстэтычны аспект. Форма і змест павінны спалучацца ў гармоніі. Наступнае пытанне,
якое паўстае пры праглядзе фільма, ці ён мае нейкае аднясенне да хрысціянскіх каштоўнасцяў,
закранае тэмы справядлівасці, пошуку сэнсу, або пытанні віны і прабачэння.