Të dielën e ardhshme, pas tri ditësh, Kisha Katolike kremton festën e Rrëshajve. Është
një nga festat më të rëndësishme të fesë së krishterë, e cila përkujton ardhjen e
Shpirtit Shenjt mbi Apostujt. Kjo ngjarje përshkruhet më së miri në kapitullin e dytë
të Veprave të Apostujve, ku shën Luka ungjilltar na bën ta përjetojmë skenën, me ushtimën
e erës së fuqishme e me gjuhët e zjarrit. Këto Rrëshajë kanë datë të njëjtë me rrëshajët
e kremtuara nga hebrenjtë, 50 ditë pas Pashkëve. Por, siç lexohet në Ungjillin sipas
Gjonit, edhe në ditën e Ngjalljes, Krishti u duket dishepujve të vet e duke hukatur
mbi ta, u thotë: “Merrni Shpirtin Shenjt” (20,19-23). A mos është kjo një “Rrëshajë”
tjetër? Për këtë argument do të flasim në emisionin e sotëm. Dy skenat e dikimit
të Shpirtit Shenjt janë pa dyshim, paralele. Vërtet, ato kanë në qendër Shpirtin e
Zotit, që përfaqësohet nga simboli i erës së fortë. Sipas shën Gjonit ungjilltar,
është Krishti ai që “hukat” mbi apostujt, me një gjest, që të kujton profetët. Ndërsa
në tregimin e shën Lukës në Veprat e Apostujve, “u ndie një ushtimë nga
qielli si shungullimë e erës së fortë dhe e mbushi të gjithë shtëpinë… Të gjithë u
mbushën me Shpirtin Shenjt” (Vap 2,2.4). Pra, në të dyja skenat, është i pranishëm
Shpirti Shenjt, që vepron mbi apostujt, por pavarësisht nga ngjashmëria, duhet thënë
se ndërmjet tyre ka edhe ndryshime. Nga njëra anë, në Ungjillin e shën Gjonit
evokohet akti krijues hyjnor, i shprehur përmes frymës, hukatjes së Shpirtit të Zotit
në krijesën njerëzore (Zan 2,7). Në takimin e Tij me apostujt, Jezusi përvijon krijimin
e njerëzimit të ri përmes dhuratës së Shpirtit Shenjt, që e shlyen mëkatin. Vërtet,
Krishti u beson apostujve e pra, Kishës së ardhshme, misionin e dhënë nga Shpirti
Shenjt: “Atyre që jua falni mëkatet, u falen” (Gjn 20,23). Këtë mision gjykimi
e faljeje, Jezusi ua paralajmëroi që gjatë jetës së Tij tokësore, shën Pjetrit (Mt
16,19) e apostujve (Mt 18,18). Nga ana tjetër, në Veprat e Apostujve dëshmohet
vazhdimësia ndërmjet Besëlidhjes së Vjetër e asaj të Re. Ato i referohen aleancës
ndërmjet njeriut – në atë rast, Moisiu – dhe Zotit në malin Sinai, me stuhinë e vetëtimat,
që e shoqëruan. Profetët Jeremia dhe Ezekieli e interpretojnë më tej këtë ngjarje,
duke e konceptuar si krijimin e një zemre të re e të një shpirti hyjnor në besimtarin:
“Shpirtin tim do ta fus në ju…”, shkruhet në Librin e Ezekielit (36,27). Nga
kjo “besëlidhje e re” lind një popull i ri, i përtërirë, i karakterizuar nga përmasa
universale, siç tregon shumëllojshmëria e gjuhëve, që janë në gjendje të flasin apostujt,
pasi dikohet mbi ta Shpirti Shenjt, sipas përshkrimit në Veprat e Apostujve. Këto
gjuhë simbolizojnë shumëllojshmërinë në të njëjtin besim e fe në Krishtin. Atëherë,
këto ndryshime ndërmjet dy pjesëve të Besëlidhjes së Re, që po shqyrtojmë, konvergjojnë
në një koncept të vetëm: Kisha lind nga Shpirti Shenjt si përsa i përket misionit
të pajtimit të shpirtave e të faljes së mëkateve, ashtu edhe përsa i përket misionit
të kumtimit të Lajmit të Mirë të Ungjillit. Mbetet vetëm ndryshimi kronologjik:
për shën Gjonin, Shpirtit Shenjt dikohet mbi apostujt “në mbrëmjen e po asaj dite”
të Pashkëve, kur Jezusi ringjallet (Gjn 20,19); ndërsa për shën Lukën kjo ngjarje
ndodh “kur erdhi Dita e Rrëshajve” (Vap 2,1), pra 50 ditë më vonë. Shumë
studiues mendojnë se kjo ngjarje historike është e vetme, por e vendosur në dy korniza
të ndryshme nga ungjilltarët, për arsye teologjike. Vërtet, dhurata e Shpirtit Shenjt
mund të paraqitet sipas perspektivave të ndryshme, por që përkojnë me njëra-tjetrën.
Të tjerë pohojnë se, meqenëse Shpirti Shenjt dikohet në disa momente të historisë,
kështu ka ndodhur edhe në zanafillën e krishterimit. Në rastin e përshkruar nga Shën
Gjoni, privilegjohet bashkësia apostolike; në atë të shën Lukës, karizma, edhe pse
fillon nga të Dymbëdhjetët, përqafon krejt turmën dhe bashkësinë e besimtarëve të
rinj. Për të dy ungjilltarët, dikimet e shumta të Shpirtit Shenjt kanë gjithnjë si
qëllim ta vazhdojnë veprën e Krishtit në Kishë e përmes saj. E në jetë të jetëve,
kjo është vepër shëlbimi, çlirimi nga e keqja dhe misioni universal.