Katolikët amerikanë hedhin në gjyq shtetin për të mbrojtur lirinë e fesë
Katolikët amerikanë denoncojnë reformën shëndetësore të presidentit Barak Obama dhe
hedhin në gjyq shtetin, i cili akuzohet se nuk i lë të lirë të shprehen e të veprojnë
sipas bindjeve të tyre. Mëse 40 organizata dhe institucione katolike, ndër të cilat
edhe kryedioqeza e Nju Jorkut, i janë drejtuar Gjykatës për të kundërshtuar hyrjen
në fuqi të një norme, e cila u imponon të paguajnë kontraceptivët dhe abortet e punonjëseve
të tyre. Kjo normë bën pjesë në reformën shëndetësore të administratës Obama dhe i
detyron punëdhënësit t’u japin punonjësve të tyre një sigurim mjekësor, ku të përfshihet
edhe asistenca për ato ndërhyrje mjekësore, që janë kundër vlerave të Kishës. Akuzuesit
e konsiderojnë këtë, kufizim të lirisë fetare, siç u pati shkruar edhe vetë kryeipeshkvi
i Nju Jorkut, imzot Timoti Dolan, ipeshkvijve të tjerë amerikanë, në një letër, ku
theksonte se kjo betejë nuk është vetëm e katolikëve. Duke i detyruar të mos veprojnë
sipas ndërgjegjes së tyre, qeveria i shtyn besimtarët të mohojnë parimet, në të cilat
besojnë.