18-20 чэрвеня 2012
г. па ініцыятыве Патрыярха Канстантынопальскага Барталамея І на востраве Халкі адбудзецца
“Саміт па глабальнай адказнасці і экалагічнай устойлівасці”. У мерапрыемстве прымуць
удзел вядомыя эколагі, навукоўцы, журналісты, тэолагі і ўніверсітэцкія выкладчыкі
з усяго свету. Падчас канферэнцыі будзе разглядацца вялікі спектр тэм: біялагічныя
разнастайнасці і ахова прыроды, энергетыка і змены клімату, эканоміка і інавацыйныя
працэсы. Патрыярх нагадаў, што гэта ўжо 8 сустрэча такога роду, пачынаючы з 1995 г.
У сваім спецыяльным пасланні, з нагоды гэтага форуму, Барталамей І адзначыў, што саміт
прымеркаваны да канферэнцыі ў бразільскім Рыо пад эгідай ААН на тэму ўстойлівага развіцця;
яна пройдзе 20-22 чэрвеня.
Ён адзначыў, што на працягу апошніх 20 гадоў гэтыя
сустрэчы намагаліся паспрыяць дыялогу ва ўсім свеце і супрацоўніцтву паміж прадстаўнікамі
навукі і рэлігіі на карысць каштоўнасцяў, звязаных з этычнымі і навуковымі пытаннямі,
якія ўзнікаюць па прычыне злоўжывання чалавекам прыроднымі рэсурсамі. Патрыярх падкрэсліў,
што аднаўленне клімату і вяртанне да адказнага выкарыстання рэсурсаў патрабуе змены
сістэмы каштоўнасцяў і перакананняў.