Касцёл у Італіі актыўна
ўключыўся ў дапамогу пацярпелым у выніку землятрусу, які адбыўся 20 мая ў рэгіёне
Эмілія Рамана на поўначы краіны. Дырэктар італьянскага аддзялення дабрачыннай каталіцкай
арганізацыі “Caritas” кс. Франчэска Содду тэрмінова наведаў месцы здарэнняў, каб ацаніць
сітуацыю і каардынаваць дзейнасць валанцёраў, якія дапамагаюць пацярпелым. Шматлікія
парафіі ў розных дыяцэзіях рэгіёна прадставілі пацярпелым рэчы першай неабходнасці,
а таксама магчымасць начлегу. Акрамя таго, перад абліччам землятрусу, іншыя італьянскія
дыяцэзіяльныя аддзяленні “Caritas” прапанавалі сваю дапамогу ў выпраўленні наступстваў
катастрофы. Арцыбіскуп дыяцэзіі Ферара-Камакіа Паоло Рабіці у інтэрв’ю нашаму радыё
расказаў, што адразу пасля землятрусу ён заклікаў усіх пробашчаў дыяцэзіі не цэлебраваць
нядзельнай св. Імшы ў будынках касцёлаў, паколькі існавала небяспека паўторных сейсмічных
штуршкоў. “Акрамя таго, я заклікаў быць уважлівымі да тых, хто найбольш пакутуе з-за
страху, або наступстваў землятрусу”, - сказаў іерарх.
Землятрус, моцай у 6
балаў адбыўся каля 4.00 у нядзелю 20 мая. Яго эпіцэнтрам стала тэрыторыя паміж Мадэнай
і Ферарай, аднак штуршкі адчуваліся і ў іншых рэгіёнах Італіі. У выніку катаклізму
загінулі 7 чалавек і каля 50 атрымалі раненні. Былі пашкоджаны дамы, будынкі прадпрыемстваў,
дзяржаўных установаў і касцёлаў, закрыты школы, эвакуіраваны каля 3 тыс. мясцовых
жыхароў, 3 бальніцы і каля 500 зняволеных турмы ў Ферары.