Святыя Кірыл і Мятод у цэнтры ўвагі Апостальскай Сталіцы
1150-годдзе пачатку
місіі апосталаў Усходняй Еўропы св. Кірыла і св. Мятода будзе у цэнтры ўвагі ўдзельнікаў
буйной міжнароднай канферэнцыі, якая пройдзе 25-26 лютага 2013 г. у Рыме з нагоды
гэтага юбілею. Форум арганізаваны Папскім усходнім інстытутам і Папскім грыгарыянскім
універсітэтам адбудзецца па ініцыятыве кардынала Юзэфа Томкі, былога прэфекта Кангрэгацыі
па справах Усходніх Касцёлаў і архіепіскапа Кірыла Васіля, сакратара гэтай ватыканскай
дыкастэрыі. “Прыбыццё св. Кірыла і св. Мятода да нашых продкаў і выкарыстанне іх мовы
ў літургіі вызначальным чынам паспрыяла распаўсюджанню веры і культуры сярод славянскіх
народаў”, - адзначыў кардынал Томка.
Сярод удзельнікаў мерапрыемства будуць
шматлікія каталіцкія і праваслаўныя іерархі: Джанфранка Равазі, старшыня Папскай рады
па культуры, Самір Халіль Самір, старшыня Папскага усходняга інстытута, архіепіскап
Афінскі Дзімітрыёс (Салахас) і іншыя.
Падчас канферэнцыі будзе разглядацца
вялікі спектр тэм: гісторыка-палітычны кантэскт, у якім дзейнічалі місіянеры, адносіны
паміж перакладам Святога Пісання і развіццём нацыянальных культур, экуменічныя аспекты
дзейнасці св. Кірыла і св. Мятода, уплыў іх ідэй на традыцыі ўсходніх славян.
На
форум прыбудуць таксама Прэзідэнт Балгарыі Росен Плеўнеліеў і прэм’ер-міністр Чэхіі
Петр Нечас. Яны прымуць удзел у адкрыцці юбілейнага года, прысвечанага апосталам Усходняй
Еўропы, якое адбудзецца 25 мая ў рымскай базыліцы Санта Марыя Маджорэ. Таксама запланавана
сустрэча палітыкаў з Бэнэдыктам XVI.