Papa për 40-vjetorin e Opam: të vijojë impenjimi për arsimin në vendet e varfëra.
Që prej 40 vjetësh, Vepra për promovimin e alfabetizimit në botë (Opam) mbështet projekte
në shumë zona të varfëra të Planetit e, për të kremtuar dhjetvjeçarin e katërt të
fondacionit, Benedikti XVI i drejtoi kryetarit të Opam, don Aldo Martini, një mesazh. Ju
inkurajoj, shkruhet në mesazh, të vijoni me hov të ri impenjimin për të favorizuar
arsimin e edukimin në vendet më të varfëra, me një stil pasurimi reciprok ndërmjet
kulturave e vëllazërive të ndryshme, në gjirin e bashkësive kishtare. Papa u jep
bekimin pjesëmarrësve në takimin ndërkombëtar, organizuar me këtë rast në Romë, me
temë “Humanizmi i brishtësisë; mësime nga Jugu i botës”. Të dhënat më të freskëta
tregojnë se në botën e sotme numërohen 790 milionë të rritur analfabetë. 2/3 e tyre,
janë gra. Në disa nga vendet më të varfëra, numri i grave analfabete arrin deri në
85%. E nuk duhet harruar se shumica janë, ose do të bëhen nëna e se prehëri i nënës
është shkolla e parë e fëmijës. Ç’ zhvillim shoqëror mund të pritet me shifra të tilla?
Të cilave u shtohen edhe 67 milionë fëmijë analfabetë në moshën e shkollës fillore
e 72 milionë adoleshentë, në moshën e shkollës tetëvjeçare, pa bërë llogari më tej.
“Plagë e hapur, që Kisha është munduar gjithnjë, e vijon të mundohet për ta shëruar,
thekson Papa, në Nxitjen apostolike Africæ Munus, botuar vitin e kaluar. Benedikti
XVI pohon se analfabetizmi, një nga forcat më negative, frenon çdo lloj zhvillimi;
është vdekje shoqërore, që mbyll të gjitha rrugët e diturisë e të përparimit. Ta
shkollosh njeriun, thekson Papa do të thotë ta bësh anëtar me të drejta të plota të
res publica, në ndërtimin e së cilës mund të japë ndihmesën e vet; ndërsa për të krishterin,
do të thotë t’i krijosh kushte për të bërë të vetin thesarin e paçmueshëm Shkrimeve
të Shenjta, që ushqejnë jetën e tij në fe”.E të mos harrojmë, në përfundim, se njeriun
e kulturuar nuk është aspak e lehtë ta mbash nën zgjedhë!