Papa: Himn për lirinë e vërtetë, në audiencën e së mërkurës
Kur njeriu e lë të veprojë Shpirtin e Krishtit në shpirt, kur mendon, punon e flet
nën ndikimin e Tij, kur frymëzohet në çdo hap e në çdo veprim nga Fryma e Shenjtë,
arrin ta mposhtë çdo lloj frike e skllavërie e të jetojë plotësisht i lirë, si Bir
i vërtetë i Zotit. Nga kush do të frikësohet, kur është nën mbrojtjen e hirit hyjnor?
Kur e di se Shpirti Shenjt do ta çlirojë nga dyshimi e frika, që mund t’i zënë pritë
në çdo hap të jetës? Duke e detyruar shpesh të bëjë atë, të cilën nuk do ta dëshironte,
të bëjë keq, në vend që të bëjë të mirën, aq të dëshiruar, siç na e kujton Shën Pali,
në Letrën drejtuar Romakëve? (cfr Rom 7,19) E pikërisht kjo është shprehje
e tjetërsimit të njeriut, e rrënimit të lirisë, për shkak të rrethanave të jetës
e, sidomos, të mëkatit të rrjedhshëm, që ngre vazhdimisht krye në thellësitë e panjohura
të ndërgjegjes sonë e të gjakut tonë. E duam të mirën, e nuk e bëjmë. Ndërsa bëjmë
pikërisht atë, që nuk e duam: bëjmë keq: herë pa, e herë me dashje! Duke e paguar
shijen e së keqes, me humbjen e lirisë shpirtërore e duke u ringarkuar pambarimisht
me barrën e rëndë të robërisë së mëkatit. Shën Pali na kujton, kështu, se nuk mjafton
vullneti ynë, për t’u çliruar nga këto kushte, e nuk mjafton as Ligji. Mund të çlirohemi
vetëm për virtyt të Shpirtit Shenjt. Me bindjen se aty ku është Shpirti i Zotit,
aty është edhe liria (2 Kor 3,17). Është Fryma e Shenjtë, e jo vullneti ynë, që
na qetëson zemrat e na ndriçon mendjet. E pikërisht kjo bindje na siguron se, përmes
lutjes, mund ta fitojmë lirinë. Mund ta shijojmë lirinë e dhuruar nga Shpirti: liri
e vërtetë, e çliruar nga e keqja e nga mëkati, për të mirën e jetës, për Hyjin. Por
liria e Shpirtit, na kujton Shën Pali, nuk njëjtësohet kurrë me shthurjen, e as me
mundësinë për të zgjedhur rrugën e së keqes; ajo njëjtësohet me frytin e Shpirtit
Shenjt, që është dashuri, është gëzim, paqe, shpirtmadhësi, bujari, mirësi, besnikëri,
butësi e vetësundim. Kjo është liria e vërtetë. I lirë është ai, që mund të realizojë
vërtetësisht dëshirën për të bërë mirë, ai që mund të provojë gëzimin e vërtetë të
bashkimit me Zotin, që nuk shtypet nën peshën e rrethanave, të cilat u prijnë në drejtime
të tjera. Në se e lëmë Shpirtin e Krishtit të veprojë në shpirtin tonë, edhe vetë
lidhja me Zotin bëhet tejet e thellë. Atë nuk mund ta këpusë më asnjë realitet e asnjë
situatë. Kuptojmë, atëherë, se përmes lutjes u çliruam nga provat e vuajtjet, ndërsa
mund të jetojmë në bashkim me Krishtin, me vuajtjen e tij, të bindur se në të ardhmen
do të mund të jetojmë edhe me lumninë e Tij. Ata që luten, nuk janë më skllevër,
as në pranga: Zoti ua copëton zinxhirët e i bën qytetarë të lirë të vendit ku jetojnë,
të Kishës e, edhe të Mbretërisë. Ata që më parë ishin pas hekurave të kryqëzuar të
mëkatit, për virtyt të lutjes, janë jo vetëm të lirë, por edhe shenjtorë; jo vetëm
shenjtorë, por edhe të drejtë; jo vetëm të drejtë, por edhe vëllezër të Krishtit,
bashkëtrashëgimtarë të lumnisë së Tij e gjymtyrë të Korpit të Tij; e jo vetëm gjymtyrë,
por edhe tempull e mjet i Shpirtit Shenjt, që vijon të kumtojë në shtigjet dredharake
të botës, se “Ku është shpirti i Zotit, aty është edhe liria!”.