Бэнэдыкт XVI: чым больш мы ідзём наперад у слуханні Бога, тым больш разумеем сэнс
нашай абмежаванасці
“Ніводны чалавечы
вокліч не бывае не выслуханы Богам”, - адзначыў Бэнэдыкт XVI падчас агульнай аўдыенцыі
на плошчы св. Пятра ў Рыме. Сваю сённяшнюю катэхезу Пантыфік прысвяціў тэме малітвы
ў Пасланнях апостала Паўла. Папа нагадаў, што гэтыя тэксты ўтрымліваюць вялікі спектр
малітваў: падзякі і благаслаўлення, праслаўлення і просьбы, малітвы аб заступніцтве,
гімны і заклікі. “Адметнасць формаў паказвае нам, як малітва прысутнічае і прасякае
ўсе сітуацыі жыцця, як асабістага, так і супольнага”, - сказаў Бэнэдыкт XVI. Папа
звярнуў увагу на некаторыя аспекты, што падкрэсліваў св. Павел: па-першае, што “малітва
не павінна разглядацца, як добрая справа, якую мы чынім у адносінах да Бога, але як
дар, плён жыватворчай прысутнасці Айца і Езуса Хрыста ў нас”; па-другое, , “у малітве,
больш чым у іншых вымярэннях існавання, мы перажываем уласную слабасць, беднасць,
адчуваем сябе стварэннямі, бо стаім перад абліччам усемагутнасці і трасцэндэнтнасці
Бога”.
“Чым больш мы рухаемся наперад у слуханні Бога, каб малітва стала штодзённым
дыханннем нашай душы, тым больш разумеем таксама і сэнс нашага абмежавання, не толькі
перад канкрэтнымі штодзённымі сітуацыямі, але таксама і ў нашых адносінах з Богам”,
- падкрэсліў Святы Айцец.
Папа нагадаў, што дапамогу ў малітве нясе Святы Дух,
які асвятляе розум і распальвае сэрца, скіроваючы нас да Бога. Затым Бэнэдыкт XVI
вылучыў тры наступствы дзейнасці Духа Хрыста у нашым хрысціянскім жыцці.
“Перш
за ўсё праз малітву, натхнёную Святым Духам, мы трапляем у такі стан, калі можам пакінуць
любыя формы страху і рабства, і жыць сапраўднай свабодай дзяцей Божых”, - сказаў Папа.
Ён дадаў, што сапраўдная свабода заключаецца ў тым, каб быць у стане па-сапраўнаму
ісці за жаданнем дабра, сапраўднай радасці, адзінства з Богам і не быць прыгнечанымі
абставінамі, якія вядуць нас у іншых накірунках.
Другое наступства прысутнасці
Святога Духа ў нашым жыцці, паводле Пантыфіка, праяўляецца ў твм, што адносіны з Богам
становяцца настолькі глыбокімі, што ім не можа пагражаць ніякая рэальнасць ці сітуацыя.
“Тады
разумеем, што з малітвай мы не вызваляемся ад выпрабаванняў і цярпення, але можам
жыць імі ў адзінстве з Хрыстом, з яго мукамі, у перспектыве ўдзелу таксама і ў Яго
хвале. Шмат разоў у нашай малітве, мы просім у Бога вызваліць нас ад фізічных і духоўных
пакутаў, і робім гэта з вялікім даверам. Аднак часта маем уражанне, што мы не былі
пачутыя, і тады ўзнікае рызыка роспачы і занядбання. Але ў рэальнасці ніводзін вокліч
чалавека не бывае не пачутым Богам і менавіта ў пастаяннай і вернай малітве мы разумеем
разам са св. Паўлам, што “цяперашнія пакуты не перашкаджаюць будучай хвале, якая адкрыецца
ў нас”, - сказаў Папа.
Наступным, трэцім вынікам прысутнасці Святога Духа ў
нашай малітве, паводле Святога Айца, з’яўлецца адкрытасць на ўсё чалавецтва і ўсе
стварэнні. “Гэта значыць, што малітва, падтрыманая Духам Хрыста, які прамаўляе глыбока
ўнутры нас, не застаецца закрытай у сабе самой, не з’яўляецца толькі малітвай за мяне,
але адкрываецца на дзяленне, на пакуты нашага часу і іншых”, - сказаў Папа. Пантыфік
адзначыў, што сапраўдная малітва не заканчаецца на нас саміх. Яна вызваляе кожнага
і дапамагае ў збаўленні свету, адзначыў Святы Айцец.