Zoja e Fatimës në Romë. Imzot Fizikela: “na fton t'ia ngulim sytë Krishtit”
Të shumta janë iniciativat, që i kushtohen Zojës së Bekuar, në këtë muaj të majit,
muaji i saj. Që nga e hëna e deri të dielën, në Romë, në kishën e shën Marisë së Hireve
në rrugën Fornaci, pranë Vatikanit, po nderohet nga besimtarët shtatorja e Zojës së
Fatimës dhe reliket e të lumëve Xhaçinta e Françesku, dy nga tre barinjtë, që e panë
Nënën e Hyjit në Portugali. Dje, kremtoi meshën e mbrëmjes në këtë kishë, kryeipeshkvi
i Vienës dhe kreu i ipeshkvijve austriakë, kardinali Kristof Shënborn. Ndërkaq, ardhja
e shtatores u kremtua me një meshë, të kryesuar nga kryetari i Këshillit Papnor për
Nxitjen e Ungjillëzimit të Ri, imzot Rino Fizikela. Gjatë homelisë, ai theksoi se
Zoja e Fatimës na fton t'ia ngulim sytë Krishtit. Po ta dëgjojmë, në mikrofonin tonë: Shpeshherë,
na kujtohen vetëm sekretet e Fatimës, por Fatima mbart një mesazh shumë më të qartë
se ato: ftesën për pendesë, pra, ftesën për t’u kthyer në rrugën e Zotit. Të mos harrojmë
se fjalët e para të Jezusit, kumtimi i Jezusit, predikimi i parë i Jezusit kanë të
bëjnë pikërisht me këtë temë të rëndësishme: “kthehuni dhe besojini Ungjillit”. Prandaj,
mesazhi që vjen nga Virgjëra e Fatimës na çon mu në zemër të Fjalës së Hyjit. Zoja,
duke u kërkuar tre barinjve të Fatimës nëse dëshironin ta dhuronin jetën e tyre, na
kërkon edhe ne të jemi të vetëdijshëm për fenë e krishterë, të marrim përsipër plotësisht
përgjegjësinë e shpalljes së Ungjillit. Kumtimi nuk është gjithnjë i thjeshtë e i
lehtë, sidomos në rrethanat e ndryshme të botës së sotme, por Zoja na fton të shpallim
shpresën, të kumtojmë dashurinë. E të mos harrojmë edhe format e ndryshme të martirizimit,
që pësojnë të krishterët edhe sot, në anë të ndryshme të botës.