U paraqit Shoqata Parlamentare e Miqësisë Itali-Shqipëri
Sot pasdite, në Bibliotekën “Xhovani Spadolini” të Senatit Italian, u paraqit Shoqata
Parlamentare e Miqësisë Itali-Shqipëri. Përveç ambasadorit të Shqipërisë, Llesh Kola,
ishin të pranishëm e mbajtën relacione edhe Ardian Ndreca, pedagog i historisë së
filozofisë moderne në Universitetin Papnor Urbanian të Romës dhe Italo Fortino, pedagog
i gjuhës dhe i letërsisë shqipe në Universitetin “L’Orientale” të Napolit. Pala italiane
përfaqësohej nga ambasadori i Italisë në Shqipëri, Massimo Gaiani. Presidenti i shoqatës
është senatori italian Basilio Giordano, i zgjedhur në kolegjin e Amerikës Qendrore
e Veriore, pra, me votat e diasporës italiane. Në shoqatën e regjistruar që në
mars të këtij viti, janë anëtarësuar të paktën njëqind deputetë, me qëllim shkëmbimin
kulturor ndërmjet atyre parlamentarëve, të cilët e njohin dhe e vlerësojnë Shqipërinë,
vend me lidhje të forta historike e gjeopolitike me Italinë. Këto shkëmbime, sipas
idesë së themeluesve të shoqatës, mund të favorizojnë marrëdhëniet ndërmjet dy vendeve,
në të gjitha fushat. Kujtojmë se që nga shekulli XV, në Itali jetojnë arbëreshët,
të cilët për ligjin aktual, konsiderohen pakicë etno-gjuhësore. Sot, ata janë rreth
300 mijë, të shpërndarë në 50 fshatra e qytete, 10 provinca e 7 rajone italiane. Emigracioni
i ri e ka shtuar numrin e shqiptarëve me 450 mijë vetë të tjerë, bashkësia e dytë
pas rumunëve.