Benedikti XVI në Toskanë: të krishterët të kontribuojnë në lindjen e një etike të
re publike. Italia ta mposhtë tundimin e çkurajimit!
Mosbesimit në impenjimin politik e shoqëror, të krishterët duhet t’i kundërvënë impenjimin
e dashurisë e të përgjegjësisë qytetare. Kështu u shpreh Papa dje pasdite, duke vizituar
qytetin e Sansepolkros, me rastin e njëqind vjetorit të themelimit. Vijonte, kështu,
vizitën baritore, nisur paradite në Arezo, ku u prit nga kryeministri italian Monti,
për të kryesuar, më pas, Meshën Shenjte në parkun Prato të qytetit, në praninë e tremijë
vetëve. Benedikti XVI e nxiti Italinë ta mposhtë, me mbështetjen morale të fesë, tundimin
e çkurajimit e, me forcën e traditës humanistike, të rifillojë rrugën e përtëritjes
morale dhe etike. Ati i Shenjtë nuk mundi të realizojë, për shkak të kushteve të vështira
atmosferike, vetëm një nga takimet e planifikuara, atë me bashkësinë françeskane,
në Shenjtëroren e La Vernës.
Kanë kaluar
njëmijë vjet që nga themelimi i Sansepolkros nga ana e shenjtorëve shtegtarë Egjidi
e Arkani, të kthyer nga Jeruzalemi me dëshirën për të hedhur themelet e një qyteti,
në të cilin dishepujt e Krishtit të bëheshin forcë lëvizëse e shoqërisë. Një qytezë,
ndërtuar mbi bazën e projektit teologjik të drejtësisë e të paqes. Duke vizituar
konkatedralen, ku u gjunjëzua para Eukaristisë e para Fytyrës së Shenjtë, kryevepër
skulpture në dru e epokës karolinge, e duke u takuar me qytetarët në sheshin mesjetar
Torre di Berta, Benedikti XVI uroi që ky mijëvjeçar të japë ndihmesën e vet për të
reflektuar mbi rrënjët e krishtera e për t’i rizbuluar, që vlerat ungjillore të vijojnë
ta fekondojnë mbarë shoqërinë. E fuqishme, thirrja drejtuar të krishterëve për impenjim
qytetar: “Sot ndjehet posaçërisht nevoja që shërbimi i Kishës ndaj botës,
të shprehet përmes besimtarëve laikë mendjendritur, të aftë për të dhënë kontributin
e tyre në qytetin e njeriut, me dëshirë për të shërbyer përtej interesave private,
përtej vizioneve të njëanshme. E mira e përbashkët vlen shumë më tepër se e mira vetjake.
E u takon edhe të krishterëve të japin ndihmesën e tyre për lindjen e një etike të
re publike”. Mosbesimit në impenjimin politik e shoqëror, të krishterët,
porositi Ati i Shenjtë, duhet t’i kundërvënë impenjimin e dashurisë e të përgjegjësisë
qytetare, të frymëzuar nga dashuria ungjillore, që kërkon të mos mbyllemi brenda vetes,
por të marrim mbi vete edhe peshën e rëndë të të tjerëve: “Të rinjve
u drejtoj ftesën të mendojnë për gjëra të mëdha: merrni zemër e guxoni! Të jeni gjithmonë
gati për t’i dhënë shije të re mbarë shoqërisë civile, me kripën e ndershmërisë e
të vetmohimit pa kurrfarë interesi. Është e nevojshme të gjenden përsëri arsye të
shëndosha për t’i shërbyer së mirës së qytetarëve”. Ftesë për të shikuar
lart e thirrje për të mos u dorëzuar përballë krizës ekonomike, kjo e Papës, drejtuar
tremijë besimtarëve të mbledhur dje paradite në parkun Prato të Arecos, prej nga Benedikti
XVI iu lut Zojës së Ngushëllimit, pajtore e qytetit: “I lypim Zotit
ngushëllimin moral, që bashkësia aretine, e mbarë Italia, ta mposhtin tundimin e çkurajimit.
Të forcuar edhe nga tradita e madhe humaniste, të rifillojnë vendosmërisht rrugën
e përtëritjes shpirtërore dhe etike, e vetmja që mund të çojë në përmirësimin e vërtetë
të jetës shoqërore e civile”. Të gjithë mund të japin ndihmesën në këtë
përtëritje, duke iu përgjigjur thirrjes së Zotit e duke e dëshmuar me dashuri përmes
mikpritjes së atij, që arrin në kërkim të lirisë e të punës, përmes ndihmës së pakursyer
ndaj të varfërve, mbrojtjes së jetës, kujdesit për familjen.
Në Areco, dreka
me ipeshkvijtë e Toskanës në Kryeipeshkvni, e, para ndarjes, muzika, ngjyrat e ndezura
të valëvitësve të flamujve, ngrohtësia e madhe e njerëzve që ngarendën për ta përshëndetur
Papën, ishin në kontrast me qiellin, ngarkuar me re të bardha, e me uljen e menjëhershme
të temperaturës. Benedikti XVI iu përgjigj turmës në festë, me një përshëndetje jashtë
programit, nga dritarja e Pallatit ipeshkvnor: “Të dashur miq, ju falënderoj
me gjithë zemër për këtë paraqitje tepër të bukur të kulturës suaj rilindase, që e
preku thellë zemrën time. Kush është i aftë ta paraqesë në mënyrë kaq të përkryer
kulturën e së kaluarës, është i aftë edhe të krijojë kulturën e së ardhmes, sepse
e njeh njeriun, e do njeriun, me dinjitetin e tij tepër të madh, si shembëlltyrë
e Zotit. E nëse jemi shembëlltyrë e Zotit, jemi edhe të aftë të ecim përpara, t’i
zgjidhim problemet e së sotmes e të hapim shtigje të reja drejt së ardhmes”. Pavarësisht
nga koha e muzgët, zemra jonë është plot me dritë, tha Papa, duke përshëndetur dioqezin
e Areco-Kortonës e të Sansepolkros. Por, për fat të keq, retë e dendura, që pushtuan
qiellin, në sa Benedikti XVI përgatitej të nisej për etapën e fundit të shtegtimit,
e detyruan ta anulonte takimin aq të pritur me françeskanët dhe klariset, në Shenjtëroren
e La Vernës, vend, në heshtjen e thellë e të patrazuar të të cilit, flet vetë Zoti.
Aty, buzë greminës së frikshme, më 1224 Françesku mori plagët e Krishtit, duke i përngjarë
plotësisht Jezusit të tij aq të dashur: “Nuk mjafton të deklarojmë se jemi
të krishterë, për të qenë të krishterë të vërtetë, e as të përpiqemi për të bërë vepra
të mira, janë fjalët e Papës, në mesazhin drejtuar bashkësisë së Shenjtërores. Duhet
t’i përngjajmë Jezusit, me një impenjim të ngadalshëm, shkallë-shkallë, që e shndërron
gjithë qenien tonë”.
“Me shembullin e jetës suaj, të frymëzuar
nga vlerat ungjillore, lexohet akoma, çojani dashurinë e Zotit njeriut të kohës sonë,
shpesh të mbyllur në individualizmin e tij, e bëhuni shenjë e mëshirës së pakufishme
të Zotit për njeriun”.
“Ngulmoni, si Varfanjaku i Asizit, në
përngjasimin me Krishtin, në mënyrë që kush t’ju takojë, të takojë Shën Françeskun,
e duke takuar Shën Françeskun, të takojë vetë Zotin”. Ishte një ditë, e
një vizitë, e para e Benediktit XVI në Toskanë, që u dha zemër jo vetëm mijëra besimtarëve,
mbledhur për ta takuar, por edhe mijëra italianëve, që po kalojnë një periudhë të
vështirë, ngarkuar me retë e dyshimit të motit të keq, ashtu si qielli i këtij shtegtimi,
që gjithsesi, u ndriçua fort nga prania e nga fjala inkurajuese e Papës.