Бэнэдыкт XVI: місійная дзейнасць мае характар тэрміновай неабходнасці
11 мая Бэнэдыкт XVI
прыняў у Апостальскім палацы нацыянальных дырэктараў Папскіх місійных таварыстваў
з розных краін свету, якія сабраліся ў Рыме на сваёй штогадовай асамблеі. Пантыфік
адзначыў, што місійная дзейнасць мае заўсёды характар тэрміновай неабходнасці, асабліва
ў нашы часы вялікіх перамен. Неабходна ўзмацняць намаганні, каб як мага больш людзей
і народаў пазнаёміліся з Праўдай, якой з’яўляецца Езус Хрыстус, адзначыў Святы Айцец.
Паводле Пантыфіка, гэта заданне асабліва важнае ў Год веры, які хутка пачнецца. “Сёння
місіі маюць патрэбу аднавіць давер да Божага дзеяння; маюць патрэбу ў больш інтэнсіўнай
малітве, каб прыйшло Яго валадарства, каб была Яго воля як ў Небе, так і на зямлі”,
- звярнуў увагу Бэнэдыкт XVI. Святы Айцец падкрэсліў, што менавіта Папскім місійным
таварыствам асаблівым чынам даверана заданне падтрымліваць слуг Евангелля, “дапамагаючы
захоўваць радасць евангелізацыі, нават калі даводзіцца сеяць у слязах”. Папа адзначыў,
што сабраныя з’яўляюцца “бачным знакам камуніі, якая існуе паміж людзьмі і сродкамі
Касцёла, якія, накшталт спалучаных сасудаў, пражываюць адно і тое ж місійнае пакліканне
і запал, і ў кожным кутку зямлі працуюць сеючы Слова Праўды ва ўсіх народах і культурах”.