Papa: persekutimi mos ta pengon të drejtën dhe detyrën e ungjillëzimit
“ Çdo njeri e çdo popull ka të drejtë të njihet me Ungjillin sipas së vërtetës”.
E me të gjitha persekutimet që ka pësuar, “Kisha nuk e humb guximin, por vazhdon të
jetë besnike ndaj mandatit” që ka marr, “e vetëdijshme se gjithmonë në historinë e
krishterë, martirët, do të thotë dëshmitarët, janë të shumtë e të domosdoshëm në udhën
e Ungjillit”. Këtë e kujtoi Papa Benedikti XVI sot paradite duke i folur Kongregatës
së Vatikanit për Ungjillëzimin e popujve dhe Veprave Papnore Misionare që janë duke
miratuar nismat e tyre në mbështetje të Vitit të Fesë. Ndër projektet e paraqitura
sot para Papës është edhe një “fushatë botërore” e cila përmes lutjes së Rruzares
Shenjte e shoqëron “veprën e ungjillëzimit në botë” dhe “rizbulimin e thellimin e
fesë”, që është mësuar “për shumë njerëz të pagëzuar”. Në Sallën Clementina të
Pallatit Apostolik sot qenë të pranishëm 117 drejtorë kombëtarë të Veprave Papnore
Misionare e Papa Ratcinger u kujtoi atyre se “në këtë fazë të ndryshimeve ekonomike,
kulturore e politike, ku shpesh njeriut ndjehet i vetmuar, i zhytur në ankthin e dëshpërimit,
lajmëtarët e Ungjillit, edhe si kumtues të shpresës e të paqes, vazhdojnë të jenë
të persekutuar si Mësuesi e Zotëria i tyre”. “Po – shtoi Papa – e para këtyre problemeve
e realitetit tragjik të persekutimit, Kisha nuk e humb guximin, duke qëndruar besnike
ndaj mandatit e misionit të Zotit të saj”. “Mesazhi i Krishtit, sot ashtu si dje –
nënvizoi Bendikti XVI – nuk mund t’i përshtatet logjikës së kësaj bote, sepse është
profeci e çlirim, është farë e një humaniteti të ri që rritet, e vetëm në mbarim të
kohërave do të ketë realizimin e vet të plotë”.