Бэнэдыкт ХVI сустрэўся з юдэйскімі лідэрамі Лацінскай Амерыкі
“Дарагія яўрэйскія
сябры”, - такімі словамі распачаў Бэнэдыкт XVI сённяшнюю сустрэчу з лідэрамі Яўрэйскага
Кангрэса Лацінскай Амерыкі. Папа адзначыў высокі дынамізм паўднёваамерыканскіх юдэйскіх
супольнасцяў, якія жывуць у краінах каталіцкай большасці. Асабліва добрыя адносіны,
паміж прадстаўнікамі Каталіцкага Касцёла і паслядоўнікамі юдаізму назіраюцца ў Аргентыне
і Бразіліі. Святы Айцец нагадаў, што у кастрычніку гэтага года будзе адзначацца 50
гадавіна пачатку ІІ Ватыканскіага Сабора і дэкларацыі “Nostra Aetate”, якая застаецца
асновай і кіраўнічым дакументам у намаганнях па павышэнні ўзаемаразумення, павагі
і супрацоўніцтва паміж двума супольнасцямі. Папа нагадаў, што ў дакуменце было выразна
выказана негатыўнае стаўленне Касцёла да ўсіх форм антысемітызму і гатоўнасць да новай
ацэнкі ўзаемаадносін паміж католікамі і юдэямі.
Святы Айцец выкарыстаў выраз
“крок за крокам”, каб ахарактэрызаваць 50-гадовы шлях, на якім абодва бакі ператварыліся
“у надзейных партнёраў і сяброў, добрых сяброў, якія нават у стане разам супрацьстаяць
крызісу”. Пантыфік звярнуў увагу, што нягледзячы на яшчэ існуючыя праблемы, ёсць падставы
дзякаваць Богу за развіццё сяброўства, даверу і павагі паміж католікамі і юдэямі.
Папа падкрэсліў значэнне супольных намаганняў у свеце, якому ўсё больш пагражае страта
духоўных і маральных каштоўнасцяў. Пантыфік выказаў упэненасць, што і католікі, і
юдэі павінны быць гарантамі павагі да чалавечай годнасці, шчырага і паважлівага дыялогу
паміж рэлігіямі і культурамі, што мае найважнейшае значэнне для будучыні ўсёй чалавечай
сям’і.