Fe e atdhe: letra e ipeshkvijve të Shqipërisë për 100-vjetorin e Pavarësisë
Ipeshkvijtë katolikë të Shqipërisë i drejtohen kombit me një Letër baritore për 100-vjetorin
e Pavarësisë së vendit. Titullohet “Fe e atdhe” e që në fillim, Konferenca Ipeshkvnore
sqaron pse e ka quajtur kështu. “Fe e atdhe – thuhet në Letër – është binomi që, për
shekuj me radhë, ka frymëzuar shumë vëllezër e motra atdhedashës, të cilët kanë punuar
pa lodhje e pa pushuar për të mirën shpirtërore dhe materiale të atdheut tonë, Shqipërisë”.
Pikërisht për kontributin e dhënë në shpalljen e pavarësisë, më 28 nëntor
1912, përmenden dom Nikoll Kaçorri dhe Luigj Gurakuqi, imzot Luigj Bumçi dhe atë Gjergj
Fishta o.f.m, “personalitete, që i bëjnë nder jo vetëm Kishës, por edhe kombit”. Më
pas, duke përshkruar historinë e Shqipërisë, ipeshkvijtë katolikë vënë theksin në
disa tema, për të cilat kërkohet kontributi i të gjithëve, si familja, dialogu e harmonia
në sferën publike, fundi i fenomenit të gjakmarrjes, drejtësia dhe ligji, integrimi
evropian, rinia.
Para se t’i japim fjalën zëdhënësit të Konferencës Ipeshkvnore,
don Gjergj Meta, po citojmë porosinë e barinjve të Kishës Katolike për të rinjtë,
në fund të Letrës, e cila ia beson të ardhmen e vendit Pajtores së Shqipërisë, Nanës
së Këshillit të Mirë. Shkruajnë ipeshkvijtë: “Mos harroni asnjëherë sakrificat e shumta,
që kanë bërë të parët tanë, traditat dhe virtytet më të bukura të trashëguara prej
tyre. Pa virtyt nuk ka atdhe”. E tani të dëgjojmë intervistën e kryeredaktorit
tonë don David Gjugja me zëdhënësin e ipeshkvijve, don Gjergj Meta….