Vatikani shënon 37 vjetorin e vdekjes së kardinalit hungarez Mindszenty
Kardinali José Saraiva Martins, prefekt nderi i Kongregatës për Çështjet e Shenjtorëve,
kryesoi, pranë Kishës romake të Shën Shtjefnit në Çelio, që njihet me emrin Santo
Stefano Rotondo, për shkak të formës së rrumbullaktë të shenjtërores, një Meshë
me rastin e 37 vjetorit të vdekjes së Shërbëtorit të Zotit,kardinalit József
Mindszenty, që u persekutua një herë nga nazistët, më pas edhe nga komunistët.
Kremtimin eukaristik e organizuan hungarezët e Romës, në bashkëpunim me Ambasadën
e Hungarisë pranë Selisë së Shenjtë, Institutin Papnor Kishtar Hungarez dhe Fondacionin
Shën Shtjefni. E intervistuam kardinalin Martins, duke e pyetur, në radhë
të parë, në se në kohët e shugurimit të tij meshtarak, në Romë, ishte në dijeni të
ngjarjeve, që po trondisnin rëndë jetën e njerëzve të thjeshtë, e, sidomos, të klerikëve,
në Hungari:
Përgjigje: - Natyrisht isha i informuar për atë, që po ndodhte
në Hungari. Edhe nga që Hungarinë e kam pasur gjithnjë për zemër. I kam ndjekur, sa
kam mundur, ngjarjet e trishtuara, që trondisnin Kishën në këtë vend, kështu kam pasur
rastin ta njoh mirë situatën e ta admiroj thellësisht kardinalin Mindszenty. Sigurisht
ishte një personalitet i madh, e jo vetëm për Hungarinë, por për mbarë Kishën katolike.
Model i vërtetë bariu, për guximin e tij të jashtëzakonshëm, për bindjet e palëkundshme,
për guximin në mbrojtje të vlerave të Kishës, të vlerave të Ungjillit, të vlerave
të krishterimit. Për mua mbetet një personalitet i madh historik, jo vetëm si civil,
por edhe, e sidomos, si klerik. Shembull e model për ne, njerëzit e Kishës.
Pyetje:
- Hirësi, kardinali është rehabilituar plotësisht, si juridikisht, ashtu edhe
moralisht. A ndikon ky fakt, në ndonjë farë mënyre, mbi Çështjen e lumnimit të Tij?
Përgjigje:
- Sigurisht ky rehabilitim, përveçse i merituar, i jep fund një historie
shumë të trishtuar, vuajtjes së madhe, që provoi kardinali. Ky rehabilitim në rendin
politik, në rendin moral, e edhe në atë politik, ishte një ngjarje vërtet e madhe.
Përsa i përket ndikimit të tij mbi Lumnimin, duhet të them se Kongregata për Çështjet
e Shenjtorëve e studion thellë kandidatin, duke ndjekur të vërtetën historike të fakteve.
E kjo e vërtetë del në dritë, natyrisht, duke studiuar dokumentacionin, që lidhet
me ngjarjet. Prandaj mund të them se rehabilitimi, në vetvete, nuk ndikon: megjithatë,
është një e dhënë shumë pozitive, që konfirmon edhe vijën e Kishës, mendimin e Kishës
lidhur me personalitetin e kardinalit Mindszenty, e mund të themi, është edhe vërtetim
i saj.
Pyetje: - Kujtoj se ai njihej si kardinali i çeliktë, mbrojtës
sypatrembur i fesë. Ç’kuptim mund të ketë për Evropën e sotme?
Përgjigje:
- Kardinali është model edhe për shoqërinë e sotme. Në një shoqëri, ku
indiferenca fetare përhapet gjithnjë më shumë; në një shoqëri, në të cilën injorohen
gjithnjë më shumë vlerat njerëzore e edhe vlerat e krishtera, atëherë sigurisht kardinali
Mindszenty është model i një aktualiteti të jashtëzakonshëm, e jo vetëm për Kishën
e sotme, por edhe për mbarë shoqërinë. Vlerat e krishtera e ato njerëzore nuk mund
të mos takohen. Nuk duhet t’i veçojmë këto dy aspekte: vlerat humane e vlerat e krishtera.
Kardinali Mindszenty është model jo vetëm për të krishterët, por edhe për mbarë shoqërinë.
E kjo, sepse vlerat njerëzore e ato të krishtera lidhen në mënyrë të pandashme. Gjithçka
vërtet njerëzore, është, në zanafillë, e krishterë. E gjithçka, në zanafillë e krishterë,
është edhe vërtet njerëzore. Shenjtorët nuk janë vetëm modele shenjtërie, por edhe
humanizmi. Shenjtorët janë ata njerëz, që e jetuan përsosurisht humanitetin e tyre.
Pyetje:
- Hirësi, përsa e i përket kardinalit Mindszenty, është diskutuar shumë lidhur
me bindjen ndaj Kishës. A është provuar, pa asnjë dyshim, se i është bindur gjithnjë
Papës Pali VI? Përgjigje: - Po, është një nga karakteristikat
e kardinalit Mindszenty. Sigurisht, në studimin e dokumentave, që lidhen me të, për
Lumnimin e ardhshëm, vihet në dukje pikërisht kjo dëgjesë ndaj Kishës. Sepse për të,
Kisha nuk ishte shoqëri, e aq. Kisha, për kardinalin Mindszenty, ishte vetë Krishti
i cili, i mishëruar në një bashkësi feje, shprese e dashurie, vijon misionin e shërbimit
ndërmjet njerëzve pas arritjes së tij tek Ati. E ai i bindej plotësisht Kishës, duke
e ditur mirë se bindja ndaj Kishës, është bindje ndaj Krishtit. Kisha është Korpi
mistik i Krishtit, është Krishti vetë, që vijon të jetë i pranishëm në histori.