Папская Акадэмія сацыяльных навук: энцыкліка “Pacem in terris” захоўвае сваю актуальнасць
Энцыкліка Яна ХХІІІ
“Pacem in terris” застаецца актуальнай сёння, калі свет знаходзіцца ў небяспецы, а
нацыяналізм, а таксама рэлігійная і расавая ненавісць штурхаюць цэлыя народы да гвалтоўных
канфліктаў - аб гэтым гаворыцца ў спецыяльным паведамленні Папскай Акадэміі сацыяльных
навук. З 30 красавіка па 1 мая члены гэтай установы разважалі над важнасцю дакумента
Яна ХХІІІ праз 50 год пасля яго выдання. Адзначаецца, што энцыкліка “Pacem in terris”
(“Мір на зямлі”), з’яўляецца адным з самых важных дакументаў сацыяльнага навучання
Каталіцкага Касцёла. “У 1963 г., у разгар “халоднай вайны” ён быў скіраваны да “усіх
людзей добрай волі”, пасылаючы моцны сігнал надзеі усім, нягледзячы на ідэалагічныя
і рэлігійныя падзелы. Чалавецтву было прапанавана пераглядзець свае структуры эканамічнага,
палітычнага і культурнага супрацоўніцтва на фундаменце агульнапрынятых прынцыпаў “свабоды,
праўды, любові і справядлівасці”, - адзначаецца ў паведамленні Папскай Акадэміі.
Падкрэсліваецца,
што энцыкліка Яна ХХІІІ, “была на самой справе сацыяльнай, бо ў ёй прысутнічае глыбокае
разважанне аб ролі чалавека ў грамадстве, а таксама аб яго цэнтральным месцы ў кожным
сацыяльным інстытуце”. “Менавіта на гэтым прынцыпе было пабудавана ўсё сацыяльнае
навучанне”, - гаворыцца ў дакуменце. Звяртаецца ўвага на тое, што сёння, нягледзячы
на тое, што халодная вайна закончылася працягваюць існаваць канфлікты на нацыянальнай,
расавай і рэлігійнай аснове, таму пасланне аб міры і супольнай адказнасці за агульнае
дабро чалавецтва застаецца актуальным.
Адзначаецца асаблівая роля Каталіцкага
Касцёла ў спрыянні мірнаму існаванню паміж народамі і ў абароне ўніверсальных чалавечых
каштоўнасцяў. Члены Папскай Акадэміі навук выказалі спадзяванне, што іх праца дапаможа
ў ажыцяўленні гэтай місіі.