Бэнэдыкт ХVI зрабіў дар былым англіканам у Вялікабрытаніі
Бэнэдыкт ХVI ахвяраваў
250 тыс. долараў на падтрымку дзейнасці Персанальнага ардынарыята Маці Божай Уолсінгемскай
ў Вялікабрытаніі. Кіраўнік гэтай структуры, былы англіканскі біскуп, кс. прэлат Кейт
Ньютан, адзначыў, што дар Папы паспрыяе стабільнасці ардынарыята – часткі Каталіцкага
Касцёла ў Англіі і Уэльсе. “Я вельмі ўдзячны Святому Айцу за яго шчодрасць і падтрымку.
Гэты падарунак – вялікая дапамога і падтрымка для нашай супольнасці, паколькі мы працягваем
развіваць нашае касцельнае жыццё і намагаемся развіваць больш шырокую евангелізацыйную
дзейнасць ў Англіі і Уэльсе”, - сказаў кс. прэлат Кейт Ньютан.
Апостальскі
Нунцый ў Вялікабрытаніі, арцыбіскуп Антоніо Менніні адзначыў, што “дар Святога Айца
з’яўляецца відавочным знакам яго асабістага ўкладу ў справу адзінства сярод хрысціян
і праявай таго, што справы Ардынарыята вельмі турбуюць Пантыфіка”.
Ардынарыят
для былых англіканаў у Вялікабрытаніі быў заснаваны 15 студзеня 2011 г. апостальскай
Канстытуцыяй “Anglicanorum coetibus”. Ён налічвае больш за 1.200 вернікаў, а душпастырскую
працу сярод іх вядзе 60 святароў.