T’i lutemi Zojës në fillim të muajit, që i është kushtuar!
Maji 2012, muaj kushtuar Zojës së Bekuar, nis me ndjetin e lutjes së përgjithshme
e misionare të Papës Benedikti XVI: Të lutemi, që në shoqëri të organizohen nisma,
që e mbrojnë dhe e fuqizojnë rolin e familjes; e të lutemi edhe që Maria, Mbretëreshë
e botës e Yll i ungjillëzimit, t’i shoqërojë të gjithë misionarët në kumtimin e Birit
të saj, Jezusit.
Po maji nis përsëri edhe nën shenjën e një premtimi, që na
mësoi Gjon Pali II: “Totus Tuus”.
“Jam krejt yti, të përkas, o Zojë”
përsërisim moton e Gjon Palit II, një vit pasi u lartua në nderimet e elterit, në
një të Diele, e cila bashkonte në një, devocionin e tij për Mëshirën Hyjnore, me atë
për Nënën e Krishtit. Ta përsërismin çdo ditë të këtij muaji, me Misteret e Dritës
të Gjon Palit II, duke ia kushtuar përsëri vetveten Zojës së Bekuar.
Totus
tuus! Më merr për dore, si more Gjon Palin II, atje ku rrjedhin ujërat e Jordanit
të lashtë, që panë Pagëzimin e Birit tënd hyjnor. Ma nxir nga Zoti hirin të shoh si
hapet qielli, si zbret Shpirti Shenjt e si pushon mbi tënd Bir. Ndihmomë ta dëgjoj
zërin e Atit, që më kujton: “Ky është Biri im i dashur. Ndiqe!
Totus tuus!
Më merr me vete në Dasmën e Kanës së Galilesë, si mysafir i paftuar, e ndërmjetëso
tek yt Bir, që uji i turbull i zemrës sime, i mendimeve të mia, i ndjenjave të mia,
të shndërrohet në verë hyjnore, në Gjakun e Krishtit. Më mëso t’i përgjigjem ftesës
sate. “Bëj gjithçka të thotë Ai”, duke e pirë me fund kelkun e shëlbimit, trashëgimi
më i bukur i Zotit.
Totus tuus! Më nis nëpër shtigjet e pafundme
të botës, deri në skajet më të harruara. Më mëso të ec mbi gjurmët e Birit tënd, për
t’ia predikuar mbarë botës Ungjillin e për t’i kujtuar se ka ardhur koha të kthehet
me gjithë zemër e t’i besojë Lajmit të mirë.
Totus tuus! Më prij kah
Mali i Lumturive e premto ta shoh edhe unë Krishtin e shndërruar, që edhe fytyra ime
të shndrisë, një ditë, si dielli, e trupi im, si drita.
Totus tuus!
Më fto në Darkën e Mbrame të Birit Tënd e bëj të jem e pranishme në çastin sublim,
kur then bukën e ma jep, duke më thënë: “Merre, ky është korpi im!”. E në çastin kur
larton kelkun e më thotë: “Është gjaku im, gjaku i besëlidhjes, që do të derdhet edhe
për ty”.
Totus tuus! Ma mbush edhe këtë maj me aromën e trëndafilave,
aromë e hirit hyjnor. Me frymën e Ringjalljes së Krishtit, që është kryevepra e Krijuesit.