Զմմառու Արծիւեան Միաբանութենէն Երեք Վարդապետներու Քահանայական Ձեռնադրութեան 20-ամեակի
Առթիւ Ս. Պատարագ։
Զմմառու Վանքի Մայր Տաճարին մէջ, Շաբաթ 28 Ապրիլի կէսօրին, Ս.Պատարագ տեղի ունեցաւ երեք
յոբելեար միաբան վարդապետներու՝ Հ. Եղիա Վրդ. Դերձակեանի, Հ. Վարդան Վրդ. Գազանճեանի
և Հ. Մովսէս Վրդ. Տօնանեանի, որոնք բոլորած էին 20 տարին իրենց քահանայական կեանքին:
Սուրբ Զոհը մատոյց Ամենապատիւ եւ Գերերջանիկ Տ Ներսէս Պետրոս ԺԹ կաթողիկոս պատրիարքը
եւ աջս առթիւ յաւուր պատշաճի իր խօսքին մէջ՝ վեր հանեց Քահանայութեան վսեմութիւնը, Զմմառու
միաբանի արժանիքները և շնորհաւորեց երեք յոբելեարները, որպէսզի եկող տարիներուն աւելի
բեղուն առաքելութիւն ունենան Տիրոջ դաշտին մէջ: Սոյն արարողութեան ներկայ գտնուեցան՝
Զմմառու Վանքի Մեծաւորը, Պէյրութի Թեմի Արհիապատիւ Յովհաննէս եպ. Թէյրուզեան, և բոլոր
Թեմական Վարդապետները և քահանաները և Լիբանանաբնակ Միաբան Հայրերը, որոնք Վանք հաւաքուած
էին թէ' այս առիթով, եւ թէ' Պէյրութի Թեմի այլեւայլ հարցերու շուրջ ժողովի համար: Հրաւիրուած
էին նաեւ յոբելեար Վարդապետներու ծնողներն ու բարեկամները: Յաւարտ Ս. Պատարագին,
սարքուեցաւ սիրոյ սեղան մը ի պատիւ երեք յոբելեարներուն, որուն ընթացքին երեքն ալ կարգով
խօսք առին, իւրաքանչիւրը իր փորձառրութենէն բան մը պատմելով, անպակաս էին նաեւ հայկական
և իտալական երգերը որոնք տօնական փայլ տուին սոյն օրուան ուրախ առիթին: Յոբելեարները
մաղթեցին որ նորանոր կոչումներով վխտայ Զմմառու Դպրեվանքը և ներկայ ժառանգաւորներն ալ
առանց վարանումի Տիրոջ օգնութեամբ հասնին Քահանայութեան աստիճանին: