Dje, në Bazilikën romake të Shën Palit jashtë Mureve, u lartua në nderimet e elterit,
Gjuzepe Toniolo “ekonomist i Zotit”.
U kremtua dje paradite në Bazilikën romake të Shën Palit jashtë Mureve, Mesha Shenjte
me ritin e lumnimit të Gjuzepe Toniolo-s, që njihet si “Ekonomist i Zotit”. Figurë
tejet e rëndësishme, pati meritën të tregonte udhën e përparësisë së njeriut e të
solidaritetit, siç e kujtoi edhe Benedikti XVI në lutjen drejtuar Mbretëreshës Qiellore,
duke përshëndetur shtegtarët, që morën pjesë në ritin, kremtuar nga kardinali Salvatore
De Giorgji, i cili u shpreh kështu për këtë figurë madhore të Kishës katolike,
nga radhët e intelektualëve, lartuar në nderimet më të larta, ato të elterit: “Ai ishte
i bindur se të gjithë, pa përjashtim, jemi të thirrur të ecim në rrugën e shenjtërisë,
domethënë, të përsosurisë së jetës së krishterë e të dashurisë së krishterë, në kushtet
e gjendjet e zakonshme të jetës. Ishte i bindur edhe se kjo shenjtëri krijon, në gjirin
e vetë shoqërisë tokësore, kushte jetese më njerëzore e se laikët shenjtërohen në
botë, për shenjtërimin e botës, pa ikur nga bota e njëkohësisht, pa i përkitur asaj,
përmes ushtrimit të detyrës së tyre, atje ku punojnë, duke i gjallëruar me frymën
e krishterë, realitetet tokësore”. I Lumi i ri e vuri në jetë këtë bindje
në mënyra nga më të ndryshmet, duke nisur nga familja, të cilën e shikonte si shkollë
kryesore për shenjtërimin dhe frymëzimin misionar të njerëzve. Toniolo ishte profesor
universitar në Padovë, Modenë e sidomos në Pizë. Prej këndej, kryeipeshkvi i Pizës,
imzot Gjovani Paolo Benoto, i pranishëm në kremtim, i priu procesionit të relikeve,
së bashku me postulatorin e çështjes së lumnimit dhe me të riun, shëruar mrekullisht
me ndërmjetësinë e të Lumit, që mbeti në kujtesë të studentëve si mësues dhe edukator,
i vetëdijshëm se ata duheshin formuar edhe krishterisht e i bindur për domosdoshmërinë
e pranisë së katolikëve në veprimtari shoqërore e politike, për të mirën e vendit. Toniolo
e deshi Kishën dhe i shërbeu me gjithë zemër, si qytetar model, duke u bërë shembull
laiciteti për mbarë botën katolike, që ai nuk donte ta shikonte të përçarë, por të
bashkuar:“Shoqëria e Rinisë Katolike, bërthamë e parë e Veprimit Katolik Italian,
Fuci, Vepra e Kongreseve, Bashkimi Katolik për Studimet Shoqërore, Bashkimi Popullor,
Javët Shoqërore, patën në të ideatorin e shkëlqyer, animatorin, koordinatorin e projekteve
kulturore, shoqërore e politike, të frymëzuara nga feja e krishterë e po ashtu edhe
strukturat katolike publike, si Universiteti i Zemrës së Krishtit, ku çoi frymën
e re, që vijon të burojë në shekuj nga Fjala e Zotit”.