“L’Osservatore Romano” аб двух новых благаслаўлёных
Сённяшняя “L’Osservatore
Romano” піша аб двух новых благаслаўлёных, якія былі ўзнесены да хвалы алтара 29 красавіка:
Слузе Божым Джузэппэ Таньёле, эканамісце і сацыолагу, бацьку 7 дзяцей і аб Слузе Божым
кс. П’еры Адрыяне Тулоржы з кангрэгацыі Рэгулярных канонікаў, мучаніку Французскай
Рэвалюцыі. Беатыфікацыя Джузэппэ Таньёла адбылася ў Папскай базыліцы св. Паўла за
мурамі ў Рыме, а кс. Туларжа ў французскім Кутансе. Гаворачы аб бл. Таньёле, ватыканскае
выданне называе яго “свецкім для ўсяго свету”. Звяртаецца ўвага на тое, што ён будучы
эканамістам і ўніверсітэцкім выкладчыкам, ясна бачыў неабходнасць навучання этычнаму
падыходу да прыняцця эканамічных законаў. У сваім дзённіку Таньёла пісаў, што ў выкладчыцкай
дзейнасці бачыў сваё духоўнае пакліканне. “Я павінен максімальна клапаціцца аб маіх
вучнях, трактуючы іх як сакральны скарб, як сяброў майго сэрца, каб весці іх шляхамі
Пана”, - прыводзіць словы новага благаслаўлёнага “L’Osservatore Romano”.
У
час калі, паводле рашэння Пантыфіка, католікам было забаронена займацца палітыкай,
бл. Джузэппэ Таньёла, клапаціўся аб тэрміновых сацыяльных праблемах: выдаваў часопісы,
прымаў удзел у дзейнасці каталіцкіх сацыяльных аб’яднанняў, адно з якіх стала асновай
для будучага Каталіцкага Універсітэта Найсвяцейшага Сэрца ў Мілане – самага вялікага
каталіцкага універсітэта ў свеце. “L’Osservatore Romano” адзначае, што “без яго асобы
было б немагчыма зразумець гісторыю сацыяльнага і палітычнага каталіцтва ў Італіі”.
У
артыкуле прысвечаным мучаніку Французскай рэвалюцыі кс. П’еры Адрыяне Тулоржы, ватыканскае
выданне называе яго “мучанікам праўды”. Адзначаецца, што ён адмовіўся падпарадкавацца
антыкаталіцкім законам прынятым рэвалюцыйным французскім урадам, застаўся верным Пантыфіку
і працягваў душпастрыскую дзейнасць. Затым па фальшывым абвінавачванні ён быў арыштаваны
і забіты. “У час калі мы часта сустракаемся са спакусай канфармізма перад дамінуючым
стылем жыцця, “мучанік веры” нагадвае хрысціянам, што любоў Бога, у адважным сэрцы,
цалкам прысвечаным Пану, можа змяніць усё жыццё і зрабіць яго моцным, праз сведчанне,
што Бог верны і заўсёды выконвае свае абяцанні”, - піша аб новым благаслаўлёным ватыканскае
выданне.