Nesër, në Romë dhe në Kutansë të Francës, do të lartohen në nderimet e elterit, dy
të Lumë të rinj. Në Bazilikën e Shën Palit jashtë Mureve, në Romë, i dërguari i Papës,
kardinali Salvatore De Xhorxhi, kremton Meshën për lumnimin e Xhuzepe Toniolos, laik
italian, sociolog, ekonomist me famë botërore, i cili, në vitin 1889, themeloi Bashkimin
Katolik për Studimet Shoqërore në Itali. Ndikoi fuqimisht në lëvizjen katolike shoqërore
italiane të fillimit të viteve ‘900, duke hedhur bazat e partisë së mëvonshme “Demokracia
e Krishterë”. Në traktatin e tij të njohur mbi ekonominë, Toniolo përvijon teorinë
e tij personale, sipas të cilës etika dhe fryma e krishterë duhet të mbizotërojnë
përmbi ligjet e ekonomisë. Në një epokë, kur po merrte hov lëvizja sindikaliste dhe
po dukej në histori diktatura e proletariatit, Xhuzepe Toniolo propozoi një zgjidhje
të problemeve shoqërore, që e refuzonte individualizmin e sistemit kapitalist, por
edhe kolektivizimin e skajshëm të sistemit socialist. Parashikonte bashkëpunimin ndërmjet
punëdhënësve dhe punëtorëve në korporata të njohura nga shteti. Propozonte gjithashtu
pushimin javor, shkurtimin e orëve të punës, mbrojtjen e pronës së vogël private e
kujdesin për punën e grave e të fëmijëve. Sot, këto arritje duken të zakonshme, por
në kohën e Toniolos, ishin çështje shtruar për zgjidhje në beteja jo të lehta shoqërore.
Lumnimi i sotëm i sociologut të shquar u parapri nga një mbrëmje lutjeje në tremen
e Bazilikës së Shën Pjetrit, në orën 21.30 të ditës së djeshme. Ndërkaq, në Katedralen
e Zojës së Kutansës në dioqezën e Kutansës e të Avranshës në Francë, kardinali Anxhelo
Amato, Prefekt i Kongregatës për Çështjet e Shenjtorëve, kremton Meshën e lumnimit
të Shërbëtorit të Zotit Pietro-Adriano Tulorzh. Meshtar i Urdhërit të Rregulltarëve
Kanonikë Premonstratens, martir, i vrarë me gijotinë gjatë Revolucionit Francez, vetëm
sepse ishte prift. Pak para se të vdiste, pati thënë: “O Zot, në duart e tua po e
lëshoj shpirtin tim. Fali armiqtë e mi!”