“L’Osservatore Romano”: скажоныя погляды на хрысціянскіх мучанікаў камунізму
Сённяшняя “L’Osservatore
Romano” звяртае ўвагу на тое, што ў краінах Заходняй Еўропы распаўсюджана неадпавядаючае
рэчаіснасці разуменне сітуацыі, якая існавала ў краінах былога сацыялістычнага лагеру.
У артыкуле пад назвай “Дэфармаваныя погляды на хрысціянскіх мучанікаў камунізму” адзначаецца,
што на Захадзе дамінавала і працягвае дамінаваць “сімвалічнае прадстаўленне аб камунізме”.
Падкрэсліваецца, што ў заходняй грамадскай думцы “замоўчваліся, ці ўвогуле ігнараваліся
ўспаміны аб жыццёвых лёсах мучанікаў веры, арыштаваных, закатаваных і забітых камуністычнымі
рэжымамі”.
Ватыканскае выданне адзначае, што 24 красавіка ў Рыме прайшла навуковая
канферэнцыя аб стратэгіях і тактыках дзейнасці Каталіцкага Касцёла перад абліччам
так званых “народных дэмакратый” у краінах Усходняй Еўропы. Між іншым, удзельнікі
гэтага форума разважалі аб жыццёвых лёсах некаторых сімвалічных асоб, якія перажывалі
пераслед за веру ў тую эпоху: венгерскага кардынала Ёзэфа Міндсэнці, Прымаса Польшчы
кардынала Стэфана Вышынскага, чэшскага кардынала Ёзэфа Бэрана, румынскага біскупа
Арона Мартона і інш. Адзначаецца, што, напрыклад, кардынал Міндсэнці, пасля вызвалення
з турмы ў Венгрыі “апынуўся ў маральным, сімвалічным і культурным палоне заходняй
грамадскай думкі”, якая, з аднаго боку, усё менш узгадвала аб ім, а з другога, прадстаўляла
яго як “чалавека мінулага, прывязанага да манархічнай і княжацкай ідэі аб Касцёле,
каб такім чынам, паказаць, маўляў, кансерватыўны і рэакцыйны каталіцкі свет, які быў
пераможаны вялікім прагрэсіўным рокам гісторыі”.
“L’Osservatore Romano” падкрэслівае,
што на Захадзе падобныя ўзгадкі аб мучаніках веры прывялі да “выкрэслення з калектыўнай
еўрапейскай памяці” успаміну аб сапраўдным абліччы камунізму і тысячах свецкіх і кансэкраваных
асобаў, якія заплацілі жыццём за тое, што былі хрысціянамі.