Çelësi i fjalëve të Kishës: këshilla e Nënës së Këshillit të Mirë
Të dashur dëgjues, sot është një ditë e veçantë për katolikët shqiptarë, pasi pikërisht
sot, më 26 prill, ata nderojnë Pajtoren e tyre, Zojën e Shkodrës, Nënën e Këshillit
të Mirë. Kush nuk e njeh historinë e figures së Zojës, që më 25 prill 1467, pikërisht
ndërsa Shkodra kërcënohej nga turqit, pas vdekjes së Skënderbeut, u ngrit mrekullisht
në qiell e shkoi në Gjenacan të Italisë, e ndjekur nga dy shqiptarë, që në analet
italiane përmenden si De Giorgis e De Sclavis, pasardhësit e të cilëve akoma jetojnë
pranë shenjtërores së Zojës. Por ç’do të thotë “Nëna e Këshillit të Mirë”? Ç’është
kjo dhuratë e çmuar e “këshillit”, që na jep Nëna e Krishtit? Po përpiqemi
ta shpjegojmë me pak fjalë. Para së gjithash, “këshilli” është një nga dhuntitë,
apo dhuratat e Shpirtit Shenjt, që “në plotësinë e tyre i përkasin Krishtit”, na mëson
Katekizmi i Kishës Katolike. Pra, njësoj si ideja e ngulitur tashmë, se Krishti është
“Urtia e amshuar dhe e mishëruar”, siç thotë shën Luigji i Monfortit duke iu referuar
një dhurate tjetër të Shpirtit Shenjt, mund të themi se Krishti është edhe “Këshilli
i amshuar e i mishëruar”. Teologu Fabiàn Rodero shpjegon më tej: “Zoja është
nënë e këshillit të mirë, sidomos sepse është Nënë e ‘Këshilltarit të mrekullueshëm’
(Is 9,5), siç e quan Izaia profet Shëlbuesin e botës”. Pra, duke e
identifikuar Jezu Krishtin me Këshillin e Mirë, kur ia kërkojmë këtë dhuratë Zojës,
kur e lusim të na këshillojë për të mirë, i themi edhe të na bashkojë plotësisht me
Birin e vet, vepër, për të cilën Ajo është mjeti më i përshtatshëm e më i përsosur. Këshillë
është edhe ajo që na ofron Zoti, kur i thotë secilit: “Do të të bëj të ditur,
do të ta mësoj rrugën që duhet ndjekur, sytë e mi do t’i përqëndroj mbi ty” (Ps
32,8). Teologët, që kanë hartuar Enciklopedinë Katolike, na mësojnë se dhuratat
e Shpirtit Shenjt i bëjnë më të përsosura virtytet e njerëzve, që i pranojnë ato.
E në rastin e veçantë të “Këshillit”, kjo dhuratë e bën më të përsosur virtytin e
maturisë, duke na nxitur “të bëjmë menjëherë e me siguri, për hir të një intuite
të mbinatyrshme, atë që duhet, sidomos në raste të vështira”. Mungesa e një
dhuntie të tillë, “na pështjellon mendimet, na bën të ngutemi në zgjidhjen e problemeve,
të jemi të pakujdesshëm kur flasim, ta vemë veten në rrezik nga veprat tona”. Në të
kundërtën, me dhuratën e “Këshillit”, “shpirti i krishterë e ndan me siguri shapin
nga sheqeri, e sheh jetën e vet dhe e përballon pa frikë, sado e vështirë, ose e mangët
të jetë ajo”. “Tani, kush më shumë se Maria – hirplotë, që “ruante gjithçka në
zemër e meditonte, që të gjithë brezat e quajnë të Lume” - duhet të na shndrisë me
“këshillat” e saj?”, shkruan pikërisht njëri nga rektorët e shenjtërores së Gjenancanit,
atë Amedeo Eramo, augustinian. Prandaj, nuk është për t’u çuditur që Papë, shenjtorë,
burra e gra me fe të madhe janë ulur në gjunjë para Zojës së Këshillit të Mirë në
Gjenancan, duke i kërkuar këtë dhuratë të madhe, duke e lutur t’u japë një “këshillë”,
sidomos kur kanë pasur vështirësi, pasiguri, rrezik për veprimtarinë e tyre? Shenjtorë
si Don Bosko dhe Don Orioni mund të radhiten ndërmjet tyre e, jo më pak, e Lumja Nënë
Terezë e i Lumi Gjon Pali II. Papa Vojtila shkoi në Gjenacan pikërisht një ditë para
nisjes për në udhëtimin e tij të paharruar, që e çoi në Shqipëri më 25 prill 1993.
Ai e solli sërish Zojën në Shkodër, në një figure-kopje të asaj të Gjenacanit, të
bekuar prej tij, që ndodhet edhe sot në shenjtëroren e re, aty ku Buna bashkohet me
Drinin, në rrëzë të kalasë së Rozafës. Nënë Tereza ka shkuar disa herë në Gjenacan,
por e fundit qe pikërisht po atë vit, më 10 qershor. Në gjunjë për një këshillë të
Zojës, e Lumja, që sapo kishte hapur shtëpitë e “Misionareve të Bamirësisë” në Shqipërinë
e pas komunizmit, linte të shkruar këtë lutje: “O Zojë, Nënë e Jezusit, kthehu
në shtëpi, në Shqipëri. Ne të duam, ne kemi nevojë për ty. Ti je Nëna jonë. Kthehu
në shtëpi, në Shqipëri. Të lutemi”. Pasi siç këndon Shkodra: “Qysh at ditë
që na u largove, të tana të zezat na kan ra” e kemi nevojë për atë këshillë të mirë,
që na kthen në rrugën e Zotit e të Birit të Tij, Jezu Krisht.