Бэнэдыкт XVI перад “Regina Caeli”: Першая Святая Камунія – падрыхтаваць з запалам,
але і прастатой
Да пераадолення першапачатковых
сумневаў і адкрыцця дару веры заклікаў 22 красавіка Бэнэдыкт XVI сабраных на плошчы
св. Пятра перад велікоднай малітвай “Regina Caeli”. Святы Айцец нагадаў, што Хрыстус
пасля свайго ўваскрасення рэальна прысутнічае ў сакрамэнтах, асабліва Эўхарыстыі.
Ён заклікаў святароў і катэхетаў сур’ёзна падыходзіць да падрыхтоўкі дзяцей да Першай
Святой Камуніі, каб даць ім шанс, падобна вучням з Эмаус, сустрэць сапраўднага Хрыста.
“Дарагія браты і сёстры! - звярнуўся да вернікаў Папа. - Сёння, у Трэцюю Велікодную
нядзелю, мы сустракаем у Евангеллі паводле Лукі ўваскрослага Езуса, які з’яўляецца
сярод вучняў (пар. Лк 24, 36) – поўных недаверу і страхаў – яны думаюць, што ўбачылі
духа (пар. Лк 24, 37). Рамана Гуардзіні пісаў: “Пан змяніўся. Ён не жыве так, як раней.
Яго існаванне (...) не можа быць зразумета. Але яно з’яўляецца існаваннем цялесным
(...), ахоплівае ўсё Яго жыццё, усё прадвызначэнне; Яго муку і смерць. Усё гэта рэальнасць.
Хоць і перамененая, але заўсёды адчувальная” (Il Signore. Meditazioni sulla persona
e la vita di N.S. Gesù Cristo, Milano 1949, 433). А паколькі ўваскрасенне не выдаляе
слядоў укрыжавання, Езус паказвае вучням рукі і ногі. І, каб іх пераканаць, нават
просіць у іх паесці. Такім чынам, вучні “падалі Яму кавалак печанай рыбы. Ён узяў
і еў перад імі” (Лк 24, 42-43). Св. Грыгорый Вялікі каментуе, адзначаючы, што “печаная
рыба не азначае нічога, акрамя мукі Езуса Хрыста, Пасярэдніка паміж Богам і людзьмі.
Бо Ён быў ласкавы схавацца ў водах роду чалавечага, ён пагадзіўся быць схопленым у
пастку нашай смерці і перажыў боль падчас мукі” (Hom. in Evang. XXIV, 5: CCL 141,
Turnhout 1999, 201).
Дзякуючы гэтым вельмі рэалістычным знакам вучні пераадольваюць
першапачатковыя сумневы і адкрываюцца на дар веры, веры, якая дазваляе ім зразумець,
што напісана пра Хрыста “у законе Майсея і ў прарокаў, і ў псальмах” (Лк 24, 44).
Мы чытаем там, што Езус “асвяціў іх розум, каб яны разумелі Пісанне. І сказаў ім:
Так напісана, што Месія павінен цярпець і ўваскрэснуць на трэці дзень з мёртвых, і
ў Ягонае імя павінна абвяшчацца пакаянне дзеля адпушчэння грахоў (...) А вы – сведкі
гэтага” (Лк 24, 45-48). Збаўца запэўнівае нас у сваёй рэальнай прысутнасці сярод нас
праз Слова і Эўхарыстыю. Такім чынам, як вучні з Эмаус пазналі Езуса падчас ламання
хлеба (пар. Лк 24, 35), таксама і мы сустракаем Пана ў Эўхарыстыі. У сувязі з гэтым,
св. Тамаш Аквінскі тлумачыць, што “неабходна прызнаць, у адпаведнасці з каталіцкай
верай, што ўвесь Хрыстус прысутнічае ў гэтым сакрамэнце (...), бо ніколі боскасць
не пакідала цела, якое прыняла” (S.Th. III, q. 76, a. 1).
Дарагія сябры, у
Велікодны перыяд Касцёл, як правіла, удзяляе дзецям Першую Святую Камунію. Таму я
заклікаю душпастыраў, катэхетаў і бацькоў добра падрыхтаваць гэта свята веры, з вялікім
запалам, але і прастатой”. (...) Гэты дзень застаецца ў памяці, як першы момант, калі
(...) разумеецца важнасць асабістай сустрэчы з Езусам” (паслясінадальная Апостальская
адгартацыя “Sacramentum Caritatis”, 19). Няхай Маці Божая дапамагае нам у старанным
слуханні Слова Пана і годным удзеле ў Эўхарыстычнай ахвяры, каб станавіцца сведкамі
новага чалавецтва.
Пасля малітвы “Regina Caeli” Святы Айцец удзяліў апостальскае
благаслаўленне і звярнуўся да сабраных чаргова на італьянскай, французскай, англійскай,
нямецкай, іспанскай і польскай мовах. Папа ўзгадаў пра ўчарашнюю беатыфікацыю ў Мексіцы
мясцовай законніцы Марыі Інэс Тэрэзы ад Найсвяцейшага Сакрамэнту і Дзень каталіцкага
ўніверсітэта Найсвяцейшага Сэрца, які праходзіць сёння ў Італіі, пад дэвізам “Будучыня
краіны ў сэрцах маладых”. Пантыфік падкрэсліў важнасць фарміравання маладых людзей,
заснаванага не толькі на навуковых і тэхнічных ведах, але перш за ўсё на каштоўнасцях.