Апостальская Сталіца зоймецца тэматыкай Касцёла ў Кітаі
23-25 красавіка ў
Ватыкане збярэцца камісія па вывучэнні найбольш важных пытанняў у жыцці Каталіцкага
Касцёла ў Кітаі. Яна была створана Бэнэдыктам XVI у 2007 г. У склад гэтага органу
ўваходзяць кіраўнікі дыкастэрый Рымскай Курыі, кампетэнтныя ў дадзенай тэматыцы, а
таксама некаторыя члены кітайскага епіскапату і прадстаўнікі манаскіх супольнасцяў.
Аб гэтым паведаміла 21 красавіка Заля Друку. Папярэднія сустрэчы былі прысвечаны тэме
падрыхтоўкі семінарыстаў, святароў і кансэкраваных асоб. На гэты раз, будзе разгледжана
пытанне фармацыі свецкіх вернікаў у святле становішча каталіцкай супольнасці ў Кітаі
і ў рамках “Года Веры”, які пачнецца ў Касцёле 11 кастрычніка гэтага году і працягнецца
да 24 лістапада году наступнага. Размова таксама пойдзе аб прагрэсе ў фармацыі святароў,
семінарыстаў і кансэкраваных асоб, і што яшчэ трэба зрабіць для іх падрыхтоўкі, адпаведнай
да іх паслугі ў Касцёле і на карысць грамадства.