"З сэрцам у кантакце". Літургічнае жыццё Усходніх Каталіцкіх Цэркваў візантыйскага
абраду (VI)
Тэма апошніх нашых
перадачаў - літургічнае жыцьцё ў бізантыйскай царкоўнай традыцыі. Сёньня я працягваю
распавядаць пра ютрань.
«Бог ёсьць Госпад» і «Алілуя»
У мінулай
перадачы я распавёў пра двупсалміе і шэстапсалміе, якімі распачынаецца ютрань. Пасля
іх наступае экценьня супакою, а пасля яе сьпеў Бог ёсьць Госпад:
«Бог ёсьць
Госпад, і Ён зьявіўся нам: блаславёны той, хто прыходзіць у імя Гасподняе» - гэта
верш з Псалму 117 (118), які фактычна зьяўляецца прыпевам і паўтараецца пасля вершаў
з таго ж псалму. Айцец Барыс Бабрынскій, кніга якога дапамагла мне падрыхтавацца
да гэтай перадачы, зьвяртае ўвагу, што першапачаткова быў такім чынам сьпяваны ўвесь
псалом, але паступова ад гэтай практыкі адышлі і сьпеў быў скарочаны да тых вершаў,
якія знаходзяцца ў сучасным Часаслове.
Трэба зазначыць, што гэты псалм ёсьць
пасхальным:
Слаўце Госпада, бо Ён добры, * бо міласэрнасьць Яго давеку. Абступілі
мяне з усіх бакоў, * і імем Гасподнім я перамог іх. Не памру, але буду жыць
* і абвяшчаць дзеі Гасподнія. Камень, адкінуты будаўнікамі, стаў вуглавым
каменем:* ад Госпада гэта,* і дзіўнае ў нашых вачох.
У Вялікім
Посьце (і на пачатку Вялікага Тыдня) замест Бог ёсьць Госпад сьпяваецца сьпеў, які
называецца Алілуя:
Сярод ночы імкнецца дух мой да Цябе, Божа: бо загады
Твае – сьвятло на зямлі. Алілуя, алілуя, алілуя. (так і пасьля наступных
вершаў). Навучыцеся справядлівасьці вы, што жывяце на зямлі. Гневам
Тваім наведай людзей непаслухмяных. Упакор, Госпадзе, упакор магутных зямлі.
Сьпеў
Алілуя, разам з вершамі, падкрэслівае начны аспект багаслужэньня. Першапачаткова менавіта
гэты псалм сьпяваўся ў данным месцы ютрані, аднак паступова сьпеў Бог ёсьць Госпад
выцясьніў сьпеў Алілуя.
Пасля Бог ёсьць Госпад сьпяваюцца адпаведныя трапары
і багародзічны, а пасля Алілуя сьпяваюцца вялікапосныя траечные песьні. Сама назва
гаворыць аб трынітарнай тэматыцы гэтай зьменнай часткі. Вось прыклад такой песьні: Тройца
адзінасутная і неразьдзельная, Адзінства ў трох і роўна вечных асобах! Табе як Богу
анёльскую песьню ўсклікаем: Сьвяты, сьвяты, сьвяты Ты, Божа наш, [...]
Слава...:
Айца беспачатнага, субеспачатнага Сына, і роўна вечнага з імі Духа, адзінае Боства,
падобна хэрувімам славіць асьмельваемся і кажам: Сьвяты, сьвяты, сьвяты Ты, Божа наш,
малітвамі ўсіх сьвятых Тваіх зьмілуйся над намі.
Цяпер...:
Судзьдзя нечакана прыйдзе, і ўчынкі кожнага стануцца яўнымі; але ў страху клічам апоўначы:
Сьвяты, сьвяты, сьвяты Ты, Божа наш, малітвамі Багародзіцы зьмілуйся над намі.
Чытаньне
Псалтыру
Пераходзім да апошняга элемента начной часткі ютрані – чытаньня
Псалтыру. Нагадваю, што Пслалтыр у бізантыйскай літургічнай традыцыі падзелены на
20 частак, якія называюцца катызмамі, і павінен быў прачытвацца за тыдзень. Першая
катызма чытаецца ў суботу вечарам на вячэрняй, а на нядзельнай ютрані чытаюцца наступныя
дзьве катызмы і г.д. На жаль у сучаснай практыцы чытаньне псалтыру часта скарачаецца.
Зьвяртае на гэта ўвагу таксама і а. Барыс Бабрынскій. На яго думку Псалтыр павінен
вярнуцца на належнае яму месца ў багаслужэньні сутачнага кола.
Канешне, паўстаюць
у сувязі з гэтым шматлікія пытаньні. Напрыклад, якім чынам рэарганізаваць чытаньне
Псалтыру, каб малітва Часасловам была даступна кожнай супольнасьці вернікаў, якія
жадаюць маліцца малітвай Царквы? Быць можа варта зрабіць так, каб у сучаснай практыцы
прачытваць увесь Псалтыр за 4 тыдня, або нават і больш? Напэўна падобныя пытаньні
паўстаюць перад ерархамі, сьвятарамі ды вернікамі Усходніх Каталіцкіх Цэркваў. Я ж
з свайго боку толькі хацеў зазаначыць, што такая праблема існуе.
Паліелей
Паліелеем
распачынаецца «Нядзельная і сьвяточная частка». Ён па сутнасьці зьяўляецца сьпяваньнем
Псалмаў 134(135) і 135(136). Грэцкае слова polieleos азначае «шматміласэрны». Гэта
назва бярэцца з Псалму 135(136), дзе ў кожным вершы паўтараюцца, як прыпеў словы:
«бо павек міласэрнасьць Яго». Зноў жа на практыцы сьпяваецца некалькі вершаў з псалмаў
з прыпевам «Алілуя! Алілуя! Алілуя!».
У гэты момант адчыняецца райскай брама,
праз якую выходзяць сьвятары. Адзін з іх выносіць на сярэдзіну царквы ікону і кладзе
яе на тэтрапод (невялікі столік, аналаг крэдэнцыі ў лацінскам абрадзе). Далей адбываецца
вялікае кажденьне храму.
У нядзелі літургічнага перыяду Перадпосьця да Паліелею
дадаецца таксама Псалм 136 (137): Над рэкамі Бабілёну мы сядзелі і плакалі... У вялікія
сьвяты далучаецца тут таксама і гэтак званае «Узьвялічваньне сьвята» (па-грэцку megalynaria,
па-цэркоўнаславянску велічаніе). Па-грэцку megalynaria азначае «узвялічваць». Менавіта
такім словам распачынаецца гэтая зьменная частка.