Përgjigje e re e Vëllazërisë së Shën Piut X, që së shpejti do të shqyrtohet nga Papa.
Arriti dje, në Vatikan, përgjigjja e Vëllazërisë Meshtarake të Shën Piut X, kërkuar
nga kardinali Uiljam Levada, prefekt i Kongregatës për Doktrinën e Fesë. Kërkesa
u bë gjatë takimit të 16 marsit të kaluar, në Vatikan, me eprorin e Vëllazërisë, imzot
Bernard Fellay. Me këtë rast kardinali Levada, duke dëshiruar të shmangë një çarje
kishtare, me pasoja të dhimbshme e të pallogaritshme, e pati ftuar imzot Fellay-n
ta sqaronte brenda muajit qëndrimin e tij, me qëllim që të arrihet në mbylljen e çarjes
ekzistuese, siç ka uruar gjithnjë edhe Papa. Përgjigjja e imzot Fellay-t do të shqyrtohet,
tani, nga diskasteri vatikanas, për t’iu nënshtruar, pastaj, gjykimit të Atit të Shenjtë.
Njoftimin e jep Komisioni Ecclesia Dei, i ngarkuar ta lehtësojë bashkimin e plotë
të anëtarëve të Vëllazërisë, themeluar nga imzot Marcel Lefebvre, që dëshirojnë të
mbeten të bashkuar me Pasardhësin e Shën Pjetrit në Kishën katolike. Përgjigjja e
imzot Fellay është “mjaft e ndryshme nga e para’ , gjykuar nga Selia e Shenjtë si
e pamjaftueshme, dhe do të vlerësohet së shpejti, shton atë Federiko Lombardi, drejtor
i Sallës vatikanase të Shtypit. I pyetur nga gazetarët, atë Lombardi e quajti tekstin
e ri ‘hap përpara dhe fakt inkurajues’. Teksti i ardhur nga bashkësia lefebvriane
përmban, njoftoi atë Lombardi, edhe propozime për integrim ose saktësime lidhur me
tekstin e “Hyrjes”, dokumentit doktrinor, dorëzuar më 14 marsin e vitit të kaluar
nga Kongregata për Doktrinën e Fesë, Vëllazërisë Meshtarake të Shën Piut X, paraqitur
si bazë kryesore për vijimin e rrugës së pajtimit të plotë me Selinë Apostolike. Kujtojmë
se është fjala për procesin e nisur më 29 janar të vitit 2009, me vendimin e Benediktit
XVI për t’u hequr shkishërimin katër prelatëve të shuguruar nga kryeipeshkvi Lefebvre
dhe për të hapur, njëkohësisht, bisedimet doktrinore me Vëllazërinë.