Кардынал Кох: у экуменічным дыялогу "пілотам" з’яўляецца Святы Дух
Сцвярджэнне, што Каталіцкі
Касцёл стварае перашкоды ў экуменічным дыялогу – непраўдзівае. Гэта падкрэсліў 16
красавіка ў Рыме старшыня Папскай рады спрыяння хрысціянскаму адзінству кардынал Курт
Кох. Наадварот – дадаў швейцарскі кардынал – Каталіцкі Касцёл, больш чым іншыя, адданы
справе аднаўлення адзінства. Ватыканскі іерарх абверг крытыку, што маўляў, падчас
пантыфікату Бэнэдыкта XVI дыялог з праваслаўнымі стаў больш інтэнсіўным, чым з пратэстантамі.
Кардынал Кох адзначыў, што Папа свядома прызначыў яго старшынёй Рады, мяркуючы, што,
як былы біскуп Базэля, прынясе свой досвед працы менавіта з пратэстанцкімі супольнасцямі.
На
думку іерарха, зараз заўважаецца адыход ад “экуменізму кансенсуса” у бок “экуменізму
адрозненняў”, заснаванага на пераадоленні розніц, якія з’яўляюцца непераадольнымі.
Кардынал Кох прызнаў, што не зацікаўлены апошнім варыянтам, паколькі яго пастаяннай
мэтай з’яўляецца адзінства Касцёла. “Прамежкавая мэта”, якой было б прызнанне ўсіх
Цэркваў з іх разнастайнасцю, таксама не пераконвае іерарха.
Старшыня Папскай
рады спрыяння хрысціянскаму адзінству, прызнаў, што пасля ІІ Ватыканскага Сабору спадзяванні
дасягнуць адзінства былі занадта высокія. Не варта забывацца, нагадаў іерарх, што
падзел з Рэфармацкімі Цэрквамі трывае на працягу 500 гадоў, а праваслаўем – тысячы,
а са старажытнымі Цэрквамі Усходу, нават больш за 1500 гадоў. Кардынал параўнаў экуменічны
рух да падарожжа самалётам, якое, хоць і пачынаецца з хуткага старту, пасля доўгага
палёту можа прывесці да думкі: “не вытрымаю”. Але тут “пілотам з’яўляецца Святы Дух”,
заключыў кардынал Кох.