Легендарны нямецкі футбаліст: сустрэча з Папам змяніла маё жыццё
Легендарны нямецкі
футбаліст Франц Бэкенбаўэр, на старонках ватыканскага выдання “L’Osservatore Romano”
расказаў аб сваіх уражаннях ад сустрэчы з Бэнэдыктам ХVI. Былы спартсмен узгадаў,
як у рамках падрыхтоўкі да Чэмпіяната свету па футболе ў 2006 г., ён будучы членам
арганізацыйнага камітэта, падарожнічаў па многіх краінах свету. У Рыме іх дэлегацыя
наведала агульную аўдыенцыю са Святым Айцом. Футбаліст расказаў, як на заканчэнне
сваёй прамовы Пантыфік прывітаў арганізатараў чэмпіяната і асабіста паразмаўляў з
ім. “Святы Айцец нечакана працягнуў мне руку. Цяжка апісаць падобныя моманты. Харызма,
якая выпраменьвалася ад гэтага чалавека, яго ўнутраны спакой, годнасць і сардэчнасць
– гэта ўсё мяне ўразіла да глыбіні”, - расказаў Бэкенбаўэр. Ён дадаў, што “у сваім
жыцці сустракаўся з многімі вядомымі людзьмі, але гэтая сустрэча была асаблівай і
безумоўна адной з самых кранальных у жыцці, якая запомніцца назаўсёды”. Футбаліст
расказаў, што падчас кароткай размовы са Святым Айцом ён уручыў Пантыфіку вымпел з
лагатыпам Чэмпіяната свету па футболе. Бэкенбаўэр адзначыў, што Папа пытаўся аб футболе,
аб падрыхтоўцы да чэмпіяната, ад стане нямецкай зборнай. Акрамя таго, футбаліст расказаў,
што заўсёды носіць з сабой здымак, які быў зроблены падчас сустрэчы з Папам. “Сустрэча
з Бэнэдыктам ХVI змяніла нешта ў маім жыцці. З таго моманту я пачаў часцей хадзіць
у касцёл. Калі Папа, праз некаторы час пасля чэмпіяната наведваў Германію я прачытаў
усе яго прамовы. Ён тады заўсёды заклікаў вернікаў сведчыць аб хрысціянскай веры.
Гэтыя словы я прыняў глыбока да сэрца”, - сказаў Франц Бэкенбаўэр.