Nga tiparet të karakterit të Atit të Shenjtë Jozef Ratcinger që më shumë bëjnë përshtypje
sigurisht janë përzemërsia e tij, butësia e tij, respekti i tij për çdo njeri, aftësia
për të dëgjuar e për të vlerësuar çdo njeri: jo vetëm bashkëpunëtorët e vet më të
ngushtë, jo vetëm ata që kanë jetuar pranë tij për shumë vjet, por edhe ata njerëz
që, gjatë audiencave e rasteve të ndryshme, e përshëndesin vetëm për një çast. Papa
Benedikti XVI e dëgjon çdo njeri dhe për secilin gjen një fjalë të veçantë në çastin
e përshtatshëm, si të ishte mik i tij i vërtetë. 85-vjetori i Benediktit XVI pothuajse
përkon me shtatë vjetorin e papnisë së tij. E për këto shtat vjet papnie mund të thuhet
shumëçka. Papnia e Benediktit XVI mund të shikohet në këndvështrime të ndryshme,
nga pika të ndryshme vrojtimi, nga profile të ndryshme. Të mendojmë, për shembull,
për fjalimet e tij në audiencat e përgjithshme, për fjalimet drejtuar të rinjve, fëmijëve,
familjeve, e drejtuesve të popujve e të kombeve të botës. Mund të themi se fjalimet
e Benediktit XVI janë të dala nga thellësia i zemrës, duke pasur mirë parasysh që
Papa ka pohuar se detyra e tij është të mbrojë fenë e njerëzve në Zotin. E ai vijon
ta kryejë këtë mision, posaçërisht me njerëzit që e kanë zemrën të pastër e vullnetin
e mirë, me ata që e kanë zemrën të thjeshtë, duke u prirë drejt takimit me Krishtin,
që është çelësi i shndërrimit të jetës sonë. Pastaj papnia e Atit të Shenjtë Ratcinger
mund të shikohet edhe nga një këndvështrim tjetër – për shembull duke u nisur nga
shtegtimet e tij apostolike baritore italiane e ndërkombëtare. Kujtojmë shtegtimin
e fundit në Meksikë e në Kubë, e kujtojmë akoma vizitat tjera apostolike, me reflektimin
mbi vlerën e pranisë së Zotit në jetën personale të njeriut e në përmasën shoqërore,
kaq vendimtare për historisë njerëzore. Në shtegtimet e tij apostolike, spikat dialogu
i madh ndërkulturor e ndërfetar dhe gatishmëria shembullore për t’i takuar të gjithë,
për t’i kuptuar të gjithë, për t’u njohur nga afër me ndjenjat më të larta të çdo
njeriu, të çdo bashkësie, të çdo kombi dhe të çdo grupi fetar e kulturor. Mendojmë
se këto janë mesazhe të vazhdueshme, themelore që na përcjell Papa Ratcinger, frytet
e të cilave do t’i shohim në vitet e ardhshme të papnisë së tij të jashtëzakonshme.
Prandaj, sot në 85 vjetorin e lindjes së Benediktit XVI, në radhë të parë urojmë
të ketë shëndet të plotë, të ketë hirin dhe ngushëllimin e Shpirtit Shenjt Zot në
këtë mision të jashtëzakonshëm të cilin është thirrur prej Hyjit ta kryejë që nga
19 prilli i vitit 2005. Urojmë edhe që njerëzit ta dëgjojnë ashtu siç e meriton, urojmë
që mesazhet e tij ungjillore të kuptohen prej njerëzve të çdo kombi, feje e kulture.
Të kuptohet se Papa e shoqëron person, çdo bashkësi njerëzore në shtegtimin për t’i
dhënë kuptim jetës e për t’u takuar me Krishtin e Gjallë, që është Udha, e Vërteta
dhe Jeta!