Кардынал Сара: выражаць каталіцкую ідэнтычнасць у валантарыяце
Больш за 140 млн.
чалавек ва ўсім свеце прымае ўдзел у валанцёрскай дзейнасці. Сярод іх вялікая частка
з’яўляецца католікамі і прадстаўнікамі іншых хрысціянскіх канфесій. Аб гэтым расказаў
кардынал Робэр Сара, старшыня Папскай рады “Cor Unum” падчас прэзентацыі кнігі “Святы
Айцец і еўрапейскія валанцёры”, якая прайшла 13 красавіка ў Рыме. Кардынал Сара, адзначыў,
што ў валанцёрскай дзейнасці важна захоўваць рысы характэрныя для каталіцкай ідэнтычнасці.
Гэта з’яўляецца важным, бо, на думку іерарха, у некаторых каталіцкіх асяродках, былі
адзначаны секулярныя тэндэнцыі. “Гэта праўда, што мы не павінны спрыяць насільнаму
навяртанню каго-небудзь, аднак неабходна выражаць нашу каталіцкую ідэнтычнасць і дзейнічаць
паводле Евангелля”, - сказаў іерарх.
Падчас прэзентацыі кнігі “Святы Айцец
і еўрапейскія валанцёры” адзначалася, што ў многіх краінах Еўропы існуе вельмі блізкае
супрацоўніцтва паміж валанцёрамі з аднаго боку, і грамадскімі і касцёльнымі ўстановамі
з іншага. На думку сакратара Папскай рады “Cor unum” біскупа Джаванні Тозо вельмі
важна падтрымаць тых, хто дзейнічае дзеля дабра ўсяго грамадства, “часта маўклівым
і заўсёды бескарысным чынам”. Паводле іерарха ў многіх краінах валанцёры замяняюць
дзейнасць дзяржавы і дзяржаўных устаноў, у такіх сферах як медыцына, дапамога патрабуючым
ці адукацыя.