Evropa e Shpirtit: mëse 300 lëvizje e bashkësi të krishtera në sheshe në 150 qytete
të kontinentit të vjetër
“Së bashku për Evropën” është titulli i nismës, që po përgatisin rreth 300 lëvizje
e bashkësi të krishtera në 150 qytete të kontinentit të vjetër, për 12 majin e ardhshëm.
Edhe Brukseli, seli e institucioneve evropiane, do të jetë e lidhur me video me këtë
iniciativë. Të krishterët e të gjitha konfesioneve duan kështu t’i kërkojnë politikës
të nxisë ndërtimin e një “Evrope të re të shpirtit”, duke përtërirë rrënjët e krishtera
të kontinentit. Manifestimi është frymëzuar nga takimi i Lëvizjeve kishtare dhe
Bashkësive të Reja, lindur në Kishën Katolike me iniciativën e të Lumit Gjon Pali
II, në Rrëshajët e vitit 1998. Duhet kujtuar gjithashtu, 31 dhjetori i vitit 1999,
kur, në përfundim të ceremonisë së nënshkrimit të Deklaratës së përbashkët të Kishës
Katolike dhe të Federatës Luterane Botërore mbi doktrinën e justifikimit, në Ottmaring
të Gjermanisë, u takuan përgjegjësit e Lëvizjeve katolike dhe ungjillore. Filluan
kështu marrëdhënie të reja ndërmjet tyre, që u pasuan nga një takim publik në Munih,
më 8 dhjetor 2001, gjatë të cilit, anëtarët e 45 lëvizjeve, bashkësive e grupeve të
Kishës Katolike, të asaj Ungjillore e të Kishave të tjera, formuluan “paktin e dashurisë
së ndërsjelltë”, themel i bashkimit. Morën edhe vendimin për të bërë së bashku diçka
për Evropën, që ajo të jetë familje popujsh të bashkuar, kombesh të pajtuara, siç
ishte në synimin e themeluesve. Më 8 maj 2004 u mblodhën në Stokholm, në manifestimin
“Së bashku për Evropën”, anëtarët e mëse 150 lëvizjeve të konfesioneve të ndryshme
të krishtera. 200 qytete të 45 vendeve u lidhën drejtpërdrejt ndërmjet tyre, duke
dhënë një dëshmi të jashtëzakonshme uniteti e vullneti për të kontribuar në bashkimin
e Evropës. Pasuan takime të tjera, gjithnjë me synimin e ndërtimit të “Evropës së
shpirtit”. Kësaj radhe, të krishterët do të mblidhen në Romë, më 12 maj, e pikërisht
në Kapitol, duke filluar nga ora 15.30. Programi është i pasur me tryeza të rrumbullakta
e me intervista mbi familjen, me të dhëna mbi integrimin e dialogun, me propozime
për të mirën e përbashkët e për një ekonomi të drejtë, por edhe me koreografi të ndryshme
e këngë. Në të njëjtën kohë, në sheshin e Ngushëllimit, do të zhvillohet një manifestim
i fëmijëve, të cilët, pas leximit të Manifestit të Brukselit 2012, do të bashkohen
me të rriturit. Të rinjtë do të jenë në sheshin e Kapitolit nga ora 18 deri në orën
20, me dëshmi e muzikë. 3.000 pjesëmarrësit e parashikuar do të theksojnë impenjimin
e tyre për një ekonomi, në shërbim të çdo njeriu e të krejt njerëzimit; përgjegjësinë
para shoqërisë që qytetet të bëhen vende solidariteti e mikpritjeje për personat me
prejardhje e kulturë të ndryshme; besimin në familjen e lidhur përmes paktit të pandashëm
të dashurisë ndërmjet burrit e gruas, bazë për një shoqëri solidare me dyer të hapura
drejt së ardhmes.