E Diela e Mëshirës Hyjnore dhuratë e madhe për mbarë njerëzimin
Këtë të diele të dytë të Pashkëve, Kisha kremton solemnitetin e festës së Mëshirës
Hyjnore. Kulti i Mëshirës Hyjnore mbetet i lidhur ngushtë me figurën e rregulltares
mistike polake, Faustina Kovalska, lindur në fillim të shekullit të kaluar e vdekur
në moshën 33 vjeçe, më 1938. Sot përshpirtëria e rregulltares, lartuar në nderimet
e elterit nga Papa Gjon Pali II, është përhapur në shumë vise të botës.
Po
ç'i kujton njerëzimit e Diela e Mëshirës Hyjnore? Themelimi i së Dielës
së Mëshirës Hyjnore nga Shërbëtori i Zotit, Gjon Pali II, duhet vlerësuar si dhuratë
e madhe për Kishën e për mbarë njerëzimin. Kjo e Dielë i krijon Kishës mundësinë t’ia
kumtojë botës mëshirën e Zotit e t’i flasë për madhështinë e saj të pambaruar.
Përhapja
e jashtzakonshme e kultit të Mëshirës Hyjnore, që nga beatifikimi i motrës Faustina
më 18 prill '93, tek kanonizimi i saj më 30 prill 2000, buron nga nevoja që ka çdo
njeri për Mëshirën Hyjnore, sepse - siç thoshte Papa Gjon Pali II - ku tjetër, përveçse
në Mëshirën Hyjnore, mund të gjejnë strehë e shpresë njeriu e bota?
Po kush
ishte Shën Faustina Kovalska?
Shën Faustina është dhuratë e Zotit
për kohën tonë, është dhuratë e trojeve të Polonisë për mbarë Kishën. Jezusi i besoi
mistikes polake detyrën t’ia përcillte mbarë njerëzimit mesazhin e mëshirës Hyjnore.
Misioni i motër Faustinës na kujton të vërtetën mbi Mëshirën Hyjnore, sepse e dimë
që ajo është një e vërtetë e zbuluar në Shkrimin Shenjt. Motër Faustina na e kujton
këtë të vërtetë në forma të reja, që i janë transmetuar nga vetë Jezusi gjatë dukjeve
të tij. Mendoj sidomos për nderimin e figures së mëshirës Hyjnore, që vjen nga vegimi
i 22 shkurtit 1931. Pastaj për orën e Mëshirës, që ia kërkoi vetë Jezusi, për lutjen
që Krishti ia mësoi motër Faustinës që t’ ia drejtonte Mëshirës së tij Hyjnore. Mendoj,
pastaj, për festën e Mëshirës Hyjnore, themeluar nga Papa Gjon Pali II gjatë kanonizimit
të Motrës Faustina, që Kisha e kremton si "E Diela e Mëshirës Hyjnore". Mendoj edhe
për përhapjen këtij kulti, që sot vijon përmes atyre që quhen "apostujt e Mëshirës
Hyjnore". E sot, pikërisht në përkim me të Dielën e Mëshirë Hyjnore, Benedikti
XVI është në pragun e 85-vjetorit të ditëlindjes dhe ntë shtatëvjetorit të papnisë… Edhe
për Papën Ratcinger kjo e Dielë e Mëshirës Hyjnore kremtohet në një atmosferë të posaçme.
Sepse edhe për Papën është dhuratë kjo mundësi për ta kremtuar 85-vjetorin pikërisht
natën e ditës kur Jezusi premtoi të reshte mbi njerëzimin një det hiresh që burojnë
nga mëshira e tij. Prandaj tani që Papa Ratcinger kremton 85-vjetorin e ditëlindjes
e 7-vjetorin e papnisë, mijëra besimtarë që u mblodhën rreth tij në Sheshin e Shën
Pjetrit në Vatikan, i lartuan një lutje korale Mëshirës Hyjnore për Benediktin XVI.
E në sa kremtojmë gjithë këto festa, kujtojmë fjalët e Benediktit XVI shqiptuar më
parë gjatë lutjes së Mbretëreshës Qiellore kushtuar kultit të Mëshirës Hyjnore: Ati
i Shenjtë Ratcinger u ndal tek kujtimi i shenjave të kryqëzimit të cilat, sipas tregimit
të Shën Gjonit ungjilltar, dalloheshin qartë në Korpin e lumnuem të Krishtit:“Këto
plagë të shenjta, ndër duar, ndër këmbë e në kraharuar, janë burim i pashterrshëm
feje, shprese e dashurie për të gjithë, posaçërisht për shpirtrat që kanë më shumë
etje për Mëshirën Hyjnore – tha Papa e në vijim shpjegoi se pikërisht prej këndej
u frymëzua edhe Gjon Pali II i cili, duke vlerësuar përvojën shpirtërore të rregulltares
së përvujtë, motrës Faustina Kovalska, shprehu dëshirën që e Diela pas Pashkëve t’i
kushtohej në mënyrë të veçantë Mëshirës Hyjnore. E Provania Hyjnore deshi që ai t’i
mbyllte sytë për dritën e kësaj toke pikërisht natën e kësaj feste. Misteri i dashurisë
përdëllyese ishte gjithnjë në qendër të papnisë së Tij – nënvizoi Benedikti XVI -
duke kujtuar më pas edhe Enciklikën Dives in misericordia si dhe fjalët e shqiptuara
nga Papa Vojltila ditën e shugurimit të Shenjtërores së Mëshirës Hyjnore në Krakovi,
më 17 gusht të vitit 2002: “Sa nevojë ka bota e sotme për Mëshirën Hyjnore”, duke
vënë kështu në dukje – vërejti Benedikti XVI – se kulti i Mëshirës Hyjnore nuk është
devocion i dorës së dytë, por përmasë e fesë dhe e lutjes të të krishterit.