Benedikti XVI dhe familjet: intervistë me don Luka Violoni-n, organizator i Takimit
botëror të Milanos.
Benedikti XVI u rikthye përsëri, sot, në orën 16.20, nga Kastel Gandolfo, në Vatikan
pas një prehjeje të shkurtër, që pasoi kremtimet e mëdha të Pashkëve. Ndërkaq, në
nivel kishtar, e jo vetëm, është gjithnjë e gjallë jehona e reflektimeve të tij të
vazhdueshme për familjet, në qendër të vëmendjes së Papës këto ditë, duke nisur nga
reflektimi i së Premtes së Madhe, tek thirrja drejtuar të rinjve në audiencën e përgjithshme
të së mërkurës së kaluar, kur i ftoi të rinjtë milanezë të përgatiten shpirtërisht
për Takimin e ardhshëm botëror të familjeve, që do të mbahet në kryeqendrën lombarde
pas një muaji e gjysëm. Në këtë përgatitje, ju ndihmoftë Konaku Shenjt, u tha Papa,
i cili pak para se të fillonte audienca e përgjithshme, kishte bekuar një ikonë të
madhe të Familjes Shenjte, që do të shtegtojë këto ditë përgatitore, në shtëpitë e
Milanos. E pikërisht njërit nga organizatorët kryesorë të tubimit të qershorit,
sekretarit të përgjithshëm të ‘Fondacionit Milano Familjet 2012”, don Luka Violoni,
iu lutëm të na komentojë fjalët e Papës:
Përgjigje:
- Papa ka folur për moskuptime, shqetësime lidhur me ardhmërinë e fëmijëve,
për sëmundje e fatkeqësi nga më të ndryshmet: deri këtu, mund ta quajmë diagnozë,
të cilën, parë në këndvështrimin sociologjik, mund ta pranojë shumëkush. Por gjëja
më e rëndësishme, që u jep vërtet zemër familjeve, duhet konsideruar shprehja e Papës:
“Familja nuk është vetëm”. Duke ia ngulur sytë Kryqit të Krishtit, ajo gjen udhën
e humbur e zbulon se nuk është e lënë pas dore, në vetmi. Për të hapet rruga e shpresës
së vërtetë. Atëherë, ndërsa ne jemi të vetëdijshëm se familja është e rrethuar nga
sfida të të gjitha natyrave e edhe nga të këqija të shumta, besoj se është themelore
të kujtohet edhe se nuk është në udhë pa krye, pa shpëtim. Shpëtimi i saj është vetë
Jezu Krishti, është Kryqi, është Ngjallja e Zotit. Që këtu duhet të rinisemi, për
t’i dhënë një mesazh shpëtimi mbarë botës.
Pyetje: - Në ç’mënyrë
i ndihmon feja familjet, sot të mbërthyera në morsën e krizës, të nevojës…
Përgjigje:
- Përvoja e fesë është përvojë bashkimi me Zotin, që të bën të zbulosh
se lidhjet familjare janë shprehje e ngjashmërisë me Të, shembëlltyrë e Tij. Kjo ndikon
shumë në bashkimin e njerëzve, të cilët i bën më solidarë, pjesëtarë të një plani
të përbashkët, që nuk i nxit t’i kërcëllojnë dhëmbët njëri-tjetrit, por ta mbëshetsin
njëri- tjetrin, të ecin krah për krah në udhët e vështira të jetës. Atëhere familja
kërkon familje të tjera për të vijuar së bashku udhën e nisur, për të ndarë me të
tjerat, ç’ka më të mirë. Në një situatë ekonomike, që është tepër e vështirë e që
mund të përballohet pikërisht me përpjekjen për të qenë të bashkuar përballë sfidës.
Bashkimi forcon. Ndërsa përçarja e bën gati-gati të papërballueshme sfidën e krizës
së dyfishtë: ekonomike e familjare.
Pyetje: - Po flasim për Takimin
botëror të familjeve, qershorin e ardhshëm: në ç’fazë përgatitore jeni, në nivel organizativ…
Përgjigje:
- Po vërejmë, pikërisht këto javët e fundit, një vëmendje jashtëzakonisht
të madhe. Kanali i internetit vizitohet gjithnjë më shpesh, shtohen kërkesat për pjesëmarrje
në Kongres e edhe në veprimtaritë e ndryshme, sidomos në ato, që lidhen me Atin e
Shenjtë, parashikuar për datën 2 qershor, në festën e dëshmisë e 3 qershor, në Meshën
papnore. Na duket se tashmë kemi shkelur në pragun e festës së familjeve, prandaj
ditët e fundit të prillit, e të parat të majit, do të jenë vendimtare për pjesëmarrjen,
që presim e shpresojmë: 5 mijë pjesëmarrës në Kongres, 200-300 mijë natën e së shtunës
me Atin e Shenjtë e 700-800 mijë, ndoshta edhe një milion - në Meshën e së dielës,
3 qershor. E, ajo që ka më shumë rëndësi, tregohet gjithnjë më tepër vëmendje për
përmbajtjen e asaj, që po komunikojmë. Po, kemi akoma shumë për të bërë, kuptohet…
Pyetje:
- E për pjesëmarrjen nga kontinentet e tjera, ç’ mund të na thoni?
Përgjigje:
- Sidomos nga disa kombe evropiane, si Franca e Spanja, kemi shumë kërkesa.
Por edhe nga Amerika Jugore: Brazili e Meksika, sidomos. Pastaj janë SHBA e Australia,
me delegacionet e tyre të shumënumërta… Është e natyrshme. Bëhet fjalë për një takim
botëror të familjeve, e kjo është vërtet diçka tepër e bukur.
Pyetje:
- Ndërmjet shumë nismave të Takimit botëror të familjeve, është edhe themelimi
i një fondi solidariteti, në ndihmë të familjeve nevojtare, që dëshirojnë të marrin
pjesë në takimin e Milanos. Si po funksionon kjo nismë? Përgjigje: -
Tani për tani, kemi arritur të mbledhim 30 mijë euro, shifër domethënëse, po ende
jo e mjaftueshme për t’i kënaqur të gjithë. Kemi kërkesa nga familjet e Haitit, të
Bjellorusisë, të Zimbaves e të vendeve të tjera, të cilave u kemi dhënë një shenjë
të vëmendjes sonë. Por na duket e arsyeshme të vijojmë punën, sepse janë edhe shumë
vende të tjera, që dëshirojnë të kenë përfaqësuesit e vet: kemi nevojë t’i dëgjojmë
tregimet e tyre, e ata kanë nevojë të dëgjojnë tonat, që pastaj të rikthehen në atdhe
me një mesazh të përtërirë. Prandaj përsërisim edhe një herë thirrjen për ndihmë,
e pastaj do të njoftojmë konkretisht cilat familje kemi ndihmuar e ç’ përvojë lindi
nga ky takim.