Бэнэдыкт XVI: сёння Уваскрослы ўваходзіць у нашы дамы і сэрцы, хоць часта іх дзверы
зачынены
Аб пераменах, якія
ўчыніла Пасха ў жыцці вучняў Хрыста, разважаў Святы Айцец падчас агульнай аўдыенцыі
11 красавіка. Папа прыбыў у Ватыкан на верталёце са сваёй летняй рэзідэнцыі ў Кастэль
Гандольфа. Тут Пантыфік праводзіць кароткі велікодны адпачынак. Звяртаючыся да вернікаў
Папа нагадаў, што пасля смерці Хрыста яго вучні былі напужаныя і зачыніліся ў доме
з-за старху перад юдэямі. “Страх сціскаў іх сэрцы і перашкаджаў ісці насустрач іншым
і насустрач жыццю”, - падкрэліў Папа. Аднак, у момант, калі “успаміны аб муках умацоўвалі
няўпэўненасць”, Езус з’явіўся перад імі нягледзячы на тое, што дзверы былі закрыты,
і сказаў: “Супакой вам”. “Гэта звычайнае прывітанне набыло новае значэнне, бо выклікала
ўнутраную перамену; гэта пасхальнае прывітанне, якое знішчыла страх вучняў”, - сказаў
Бэнэдыкт XVI. Ён падкрэсліў, што ў дзень уваскрасення Пан падарыў поўню супакою, якая
для супольнасці вучняў стала крыніцай радасці, упэўненасці ў перамозе і надзейнай
апоры на Бога. “Няхай не хвалюецца ваша сэрца і не мае страху, кажа Ён таксама да
нас”, - сказаў Папа.
Пантыфік звярнуў увагу на тое, што Езус паказаў сваім
вучням раны, і так яны “зразумелі збаўчы сэнс яго мукі і смерці”. “Смутак аб ранах
стаў крыніцай радасці”, - сказаў Святы Айцец. Ён адзначыў, што Хрыстус вярнуўся да
вучняў, каб заклікаць іх ісці і распаўсюджваць веру па усім свеце. “Ён выканаў сваю
місію ў свеце, а зараз пасылае іх сеяць ў сэрцах веру, каб Айцец, вядомы і любімы,
мог сабраць усіх сваіх згубленых дзяцей”, - сказаў Бэнэдыкт XVI.
“Дарагія сябры,
таксама і сёння Уваскрослы ўваходзіць у нашы дамы і сэрцы, хоць часта іх дзверы закрыты.
Ён уваходзіць даючы радасць і супакой, жыццё і надзею, дары, у якіх маем патрэбу для
нашага чалавечага і духоўнага перараджэння. Толькі Ён можа адсунуць магільныя камяні,
якія чалавек часта ставіць перад сваімі пачуццямі, адносінамі, паводзінамі; камяні,
якія правакуюць смерць: падзелы, варожасць, крыўды, зайздрасць, абыякавасць. Толькі
Ён, Жывы, можа даць сэнс нашаму існаванню і паставіць на шлях тых, хто стаміўся, згубіў
давер і надзею”, - сказаў Святы Айцец.
Бэнэдыкт XVI нагадаў, што падчас сустрэчы
з вучнямі па дарозе ў Эмаўс, Хрыстус тлумачыў ім Святое Пісанне, праз прызму самаго
сябе і сваёй пасхальнай таямніцы. “Сэнс усяго: законаў, прарокаў і псальмаў, раптоўна
адкрыўся і стаў ясным перад іх вачыма”, - сказаў Папа. Ён падкрэсліў, што затым, вучні
пазналі Хрыста пры ламанні хлеба.
“Гэты эпізод указвае нам на два “месцы”,
дзе можам сустрэць Уваскрослага, перамяняючага жыццё: слуханне Слова ў адзінстве з
Хрыстом і ў ламанні хлеба. Гэтыя два “месцы” злучаны паміж сабой, бо “Слова і Эўхарыстыя
так цесна звязаны з сабой, што нельга зразумець першага без другога: Слова Божае становіцца
сакраментальным целам у эўхарыстычнай падзеі (Verbum Domini, 54-55)”, - сказаў Пантыфік.
Папа
адзначыў, што пасля сустрэчы з Хрыстом, аднавіўся энтузіязм веры яго вучняў, любоў
да супольнасці і ўпэўненасць у неабходнасці дзяліцца добрай навінай. “Настаўнік уваскрос
і з Ім уваскрэсла ўсё жыццё; сведчыць аб гэтай падзеі стала для вучняў жыццёвай неабходнасцю”,
- падкрэсліў Святы Айцец. Ён заклікаў вернікаў прайсці той самы шлях, які здзейснілі
вучні з Эмаўс, праз адкрыццё Слова Божага і Эўхарыстыі. “Ісці з Панам і дазволіць
Яму расплюшчыць нашы вочы на сапраўднае значэнне Пісання і Яго прысутнасць у ламанні
хлеба”, - сказаў Папа.