Кіраўніцтва Ліванскай
Рэспублікі і Камісія каталіцкага епіскапату краіны па СМІ паведамілі, што 14-16 верасня
адбудзецца апостальскае падарожжа Святога Айца ў Ліван. Яно будзе звязана з падпісаннем
паслясінадальнай адгартацыі для Блізкага Усходу. У паведамленні ліванскага кіраўніцтва
гаворыцца, што “у адказ на запрашэнне, якое было накіравана Папе Прэзідэнтам Ліванскай
Рэспублікі, Яго Святасць Бэнэдыкт XVI наведае з дзяржаўным візітам Ліван. Гэты візіт
пацвярджае глыбіню гістарычных сувязяў, якія звязваюць Ліван і Святы Пасад”, - падкрэслена
ў паведамленні.
Каталіцкі Касцёл у сваю чаргу выказвае радасць з візіту Папы
і падпісання ім важнага для Касцёла на Блізкім Усходзе дакумента. Епіскапат краіны
паведамляе, што адбудуцца сустрэчы Святога Айца з лідэрамі краіны, палітычнымі і рэлігійнымі.
Бэнэдыкт XVI сустрэнецца таксама з мясцовай моладдзю. Завершыцца візіт св. Імшой у
Бейруце, дзе Святы Айцец уручыць падпісаную напярэдадні апостальскую адгартацыю.
Спецыяльная
асамблея Сіноду Біскупаў для Блізкага Усходу адбылася ў Ватыкане 10-24 кастрычніка
2010 г. на тэму “Каталіцкі Касцёл на Блізкім Усходзе: адзінства і сведчанне”.