Simbolet e Pashkëve sipas Papës, në homelinë e Natës së Solemnitetit
Duke u ngjallur, Jezusi i tërheq të gjithë në dritën e Tij dhe fiton mbi çdo formë
të errësirës, pohoi Papa, gjatë Meshës, kryesuar në Bazilikën e Shën Pjetrit Natën
e Pashkëve. Në një homeli, që sintetizoi figurativisht mrekullitë e krijimit, sipas
Besëlidhjes së Vjetër e asaj të Re, Benedikti XVI krijoi kontrastin e fuqishëm, të
përjetshëm, ndërmjet dritës e errësirës, duke shpjeguar edhe ç’do të thotë ‘dritë’
e ç’do të thotë ‘errësirë’.
Prej këndej, shpjegoi edhe kuptimin e fjalëve
“dritë” e “ndriçim”. Në Natën pa gjumë të Pashkëve, natë e krijimit të ri, Kisha
e paraqet misterin e dritës me një simbol shumë të veçantë e krejt të përvuajtur:
me një qiri pashke. Është drita, që jeton në sajë të flijimit. Qiriu ndriçon, duke
shkrirë vetveten. Jep dritë, duke dhuruar vetveten. Deri në fund të fundit! Bëhet,
kështu, simbol mahnitës i misterit të Pashkës së Krishtit, i cili, duke dhuruar
vetveten, na jep dritën e madhe. Qiriu i Pashkës na kujton edhe se drita e
tij është zjarr. Zjarri është forca që i jep trajtë botës; fuqia që shndërron. E,
të mos harrojmë, pa zjarr, nuk ka ngrohje. Edhe këtu bëhet i dukshëm misteri i Krishtit.
Krishti, dritë, zjarr, flakë që djeg të keqen, duke e shndërruar, kështu, botën, e
të gjithë neve. “Kush është pranë meje, është pranë zjarrit”, tingëllon fuqishëm në
Natën e pagjumë të Pashkëve, kjo fjalë e Jezusit, që vjen mes nesh përmes veprës së
Origjenit. E ky zjarr është njëherësh edhe ngrohtësi; nuk është dritë e akullt, por
dritë në të cilën shkrihen në një ngrohtësia e mirësia e Zotit. Himni i madh
i Exultet, që diakoni e këndon në krye të Liturgjisë së Pashkës, na kujton një aspekt
tjetër. Na sjell në mendje se qiriu, në radhë të parë, është fryt i punës së
bletëve. Kështu përfshin simbolikisht mbarë krijimin. Në qiriun e Pashkës, krijimi
bëhet mbartës i dritës. Por sipas mendimit të Etërve të Kishës, bëhet edhe simbol
i vetë Kishës. Bashkëpunimi në bashkësinë e gjallë të besimtarëve në Kishë, është
gati-gati si bashkëpunim i bletëve rreth zgjoit. Ndërton bashkësinë e dritës. E tek
qiriu, që ndriçon Natën e pagjumë të Pashkës - kujtoi ende Papa- ne mund të shikojmë
edhe vetveten, pjesëmarrjen tonë në bashkësinë e Kishës, që dëshiron ta ndriçojë mbarë
botën me dritën e Krishtit. Ta lusim, prandaj Zotin, në këtë orë të pagjumë, të
na mbushë plot me gëzimin e dritës së Tij! e ta lusim që edhe ne të bëhemi mbartës
të dritës së Krishtit të Ngjallur; e që përmes Kishës, shkëlqimi i fytyrës së Krishtit,
të hyjë në jetën e botës!